India-in South Africa sawp nawn

India chuan nimin khan second Test-ah South Africa chu innings khat leh run 136-in an hneh a, match hmasa zawkah an chak tawh bawk avangin series an la chiang tawh. Pune-a second Test khelh hi October 10 khan khelh ṭan a ni a, India hian ni lina lekah hnehna an chang.

India hi ṭhumvawrah chakin vuak hmasak an thlang a, captain Virat Kohli-a'n thi loin run 254 tehmeuh siamin run 601/5 ah an duhtawk. Proteas bat hun a thleng a, Ravinchandran Ashwin-a'n wicket li lain run 275 an siam tihin an vawm hlum vek. 

South Africa hian run 326 chuanga an phak loh avangin an 'follow on' a ṭul a, second innings-ah mikhual team hian run 189 chauh an siam theih avangin an chak lo. Men in Blue hian February 2013 aṭang khan an mualah Test series a zawnin vawi 11 an la tawh a, record thar a tling. Australia chuan November 1994 - November 2000 inkar bakah July 2004 - November 2008 inkar khan Test match 10 ve ve an mualah hnehna an chang a, India hian he record hi an khum chiah a ni.

India leh South Africa hian October 19-23 inkar hian Ranchi-ah third Test an khel dawn a, inkhel result hian ICC World Test Championship-ah nghawng a neih zel avangin Kohli hote tan chak a pawimawh ang.

India 601/4d

Virat Kohli    254*

Mayank Agarwal    108

Ravindra Jadeja    91

Kagiso Rabada    93/3

Senuran Muthusamy    97/1

Kehsav Maharaj    196/1

South Africa 275

Kehsav Maharaj    72

Faf du Plessis    64

Ravichandran Ashwin    69/4

Umesh Yadav    37/3