Chak lo mah se Mary Kom a lawm

MC Mary Kom chuan a tum ram a thleng zo lo a, Manipuri boxer hian gold medal la phak lo mah se AIBA Women’s World Championships-a a thlen chinah a lawm thu a sawi.

Kum 36 mi Kom hi 51kg huangah Busenaz Cakiroglu chu 4-1 a hneh loin a zinkawng a tawp a, world champion vawi ruk ni tawh hi tun ṭum inelnaah chuan bronze medal chinah a lungawi a ngaih phah. India boxer Kom chuan, "Judge thutluknaah sawisel tur ka nei lo, ka chak lo tih hi ka pawm thlap. Chak tumin ka beisei a, beisena ka nei bawk, a chak lo lama ṭan erawh a hrehawm hle.

"Inelna pumpui ka thlir erawh chuan ka khelh danah ka lawm, tuna ka khelh dan hian nakin zel atan beiseina min siam," a ti. Nakkuma Tokyo Olympic an neih hunah Kom-i hi 51kg huangah a inlan ngei beisei a ni. Ulan-Ude, Russia-a inelna neihah India boxer dang Manju Rani chuan final a lut. Mahse, nimina gold medal inchuhna inhnekah Rani hi Russian nula Ekaterina Paltceva chu 4-1 a hneh loin silver medal a hlawh chhuak ve thung.

Kum 20 mi Rani chauh hi Indian boxer zingah final lut phak awmchhun a ni a, khawvel huap inelna lian a hmachhawn hmasa berah a chungnung ber ni nghal lo mah se a ṭha pahnih zinga a tel theih avangin a lakah beiseina a sang zui dawn.