Conte-a’n player ṭha khek a tum?

Champions League last 16 an luh zawh loh avangin Inter Milan chuan Europa League last 32 an khelh chhunzawm a ngai, Italian club hian zanin dar 11:25 hian Ludogorets Razgrad an hmachhawn ang.

Bulgaria rama inkhel tur ni mah se Inter hi chak zawk tura rinkai an ni. Italian chanchinbu Gazzetta dello Sport-in a tarlan dan chuan Inter manager Conte hian a player ṭha ṭhenkhat chu hahchawlhtir a tum.

Inter khingpui tur Ludogorets hi Bulgarian legaue lamah chuan hmahruai mektu an ni a, an league match hnuhnung berah Botev Vratsa chu 6-0 ngawta an sawp theih avangin inrintawkna an nei sang dawn, zuam sual theih tur an ni.

Italian manager Conte-a’n tlarhnung lamah Diego Godin, Milan Skriniar, Stefan de Vrij, Antonio Candreva leh Ashley Young te a chhawr lo a nih pawhin Danilo D’Ambrosio, Andrea Ranocchia, Victor Moses leh Cristiano Biraghi te a la nei tho.

Player ṭhenkhat chawl mah se midfielder Christian Eriksen erawhin a vawi hnih nan a club thar tan inkhel bul a ṭan theih beisei a ni a, hremna hmang zo hlim striker Lautaro Martinez pawh a inlan a beiseiawm.

Inter hi Serie A champion tum ni mah se an league match hnuhnung berah Lazio an ngam loh avangin a chung ber aṭangin pathumnaah an tla hniam, manager Conte-a’n Juventus rorelna tih tawpsak a duh avangin Europa League lamah chuan a neih ṭhat ber ber a chhawr rih lo a nih pawhin a mak lo ang.