Indian football hma hun a chiang ta

India rama football thuneitu sang ber All India Football Federation (AIFF) chuan nimin khan India ram football kalphung tur a puang chiang ta a, Indian Super League chu India rama league sang ber a ni dawn. 

Asian Football Confederation (AFC) hmunpui Kuala Lumpur-ah AIFF chuan Indian football hma hun puan chianna hi an nei a, I League pawh kalpui chhunzawm zel tur a ni. AIFF thu chhuak aṭanga a lan dan chuan season lo awm tur hi chu kalphung pangngai angin a la kal dawn a, ISL leh I League a la awm zel ang. 

Mahse, ISL champion hian AFC Champions League an chang dawn a, I League champion-in AFC Cup aia sang an beisei tawh lo thung. 

I League champion chu ISL-ah kaisantir an la ni rih dawn lo a, ISL-ah hian relegation a la awm dawn lo bawk. Mahse, he season-a ISL khel ṭan tur hian I League club pahnih chu AIFF hian a sawm thei dawn a, East Bengal leh Mohun Bagan chu sawm tur chiangsaa ngaih an ni. 

Kolkata club pahnih hian kum tina pek ṭhin vaibelchhe 10-15 inkar chu an pek a ngai thung dawn a, hei erawh an hnial vakin a rinawm lo. 

ISL-ah promotion leh relegation a la awm dawn chuang lo a, a tawi zawnga sawi chuan season lo awm tura Indian football kalphung ang hi an kal dan tur a ni. 

Mahse, I League aṭanga franchise fee pea ISL khel tur club pahnihten ISL an khelh ṭan season tur a ni a, ngaihven a hlawh khawp ang. AIFF chuan league dan thar puanna hun atan a hmang dawn thung a, he dan thar an duan hi 2024-2025 season atana hman ṭan tura tih a ni ang. 

I League champion chuan he season aṭang hian Indian Super League an khel ṭan ang a, ISL-ah relegation hman a la ni rih dawn chuang lo. 

Mahse, I League champion hian ISL club dangin kumtina an chawi ṭhin vaibelchhe 10-15 inkar chu an chawi ve a ngai dawn lo thung a, national club licensing criteria an paltlang ngei a ngai thung. Chutihrual chuan ISL club ten an insem ṭhin 'central revenue' an tih, league aṭanga hlawkna an hmuh sumte chu I League champion hian an dawng ve lo ang. 

He season-ah hian a hma season ang chiahin engkim kalpui tur a ni a, inthlak danglamna langsar engmah a awm dawn lo. 

I League champion chu ISL khel turin an tling dawn a, mahse top flight league aṭang hian club an la relegate thei dawn chuang lo tihna a ni. Franchise fee an chawi lo ang a, league hlawkna aṭangin sum an dawng ve lo bawk ang. Promotion a awm dawn avang hian Aizawl FC tan pawh ISL khelh hi beisei ngam tur chi a ni. 

He season aṭang hi chuan AIFF hnuaiah league pakhat chauh a awm a thiang tawh dawn a, chumi awmzia chu I League hi tihtawp a ni dawn tihna a ni. 

Mahse, Indian FA hian league pakhat bakah knockout cup tournament a huaihawt ang a, league-ah relegation leh promotion hman ṭan tur a ni bawk. Kum 2024 hi 2021-a AIFF-in ruahmanna a duan lawk hman ṭan hun tur a ni dawn a, he kum hi Indian football hmel danglam dawrh kum tur a ni ang. 

AIFF-in I League club lungawi lote a lo tiam lawk tawh ang ngeiin a lai thei ang berin thutlukna an siam niin a lang a, I League club-te tan pawh lungawi loh viauna tur a awm rih lo. Kum 2010 khan AIFF hian tuna ISL buaipuitu IMG-Reliance hi kum 15 chhung atan contract a ziahpui a, an inremna zat hi vaibelchhe 700 hu a ni. 

Hriat tel atana ṭha chu kum 2025 hi IMG leh AIFF thawhdunna tawp kum tur a ni a, Reliance lam hian thawhdun zel an thlang ang em? Indian football a ngaihnawm chho zel dawn niin a lang.