Marathon record siamtu Brigid Kosgei

Kawng thui intlansiakna ngaihhlut leh hriat hlawh Chicago Marathon neih zawh takah Brigid Kosgei chuan world record thar a siam, mel 26.1 (42km) a thui intlansiak hi Kenya nula hian darkar hnih, minute 14 leh second 04 chhungin a thleng.

Britain mi Paula Radcliffe chuan 2003 khan darkar hnih, minute 15 leh second 25 chhunga thlengin record hi a lo siam tawh, tun ṭumah hian he record hi second 81-in an rawn khum ta chiah a ni. Ethiopa nula Ababel Yeshaneh chu pahnihnaah a thleng, ani hian Kosgei chu minte ruk leh second 47-in a phak lo. Mipa inelna lama tlan zingah mi 22 chauh chu Kosgei-i aia thleng hma an ni a, kum 1946 kha chu nise mipa record a khum hial ang.

Kum 25 mi Kosgei chuan, "Hmeichhe tan darkar hnih leh minute 10 chhunga thlen theih a nih ka ring, ka hun hman hi tun aia rei lo a la nih theih ka beisei," tiin world record siam tawh mah se a aia ṭha zawka tlan theih a la inbeisei.