Bale-a goal a tawk lo

Pathianni zan khan Wales leh Croatia te 1-1 in an inhnehtawk a, Gareth Bale leh Wales tan European Championship khelhna kawng a zim zel. Group E inkhel dangah Hungary-in Azerbaijan 1-0 in an hneh a, point thum hlu tak an hlawh chhuak.

Cardiff Stadium-a inkhelah Croatia midfielder Nikola Vlasic-a'n minute 9-naah goal kilah lei hrulin a pet a, keeper Wayne Hennessey tan ban phak a ni lo. Ṭum dang ang bawkin Bale a langsar a, Aaron Ramsey a awm loh bawk avangin Real Madrid forward hi a pawimawh lehzual. First half injury time-ah Bale hian goal pawimawh a khung a, second half-ah goal dang a luh belh lo. Team innghahna Bale erawh a bai chhuak.

Wales coach Ryan Giggs chuan, "Beisei tur kan la nei a, match hnih khelh hmabak hi a awlsam dawn lo. Bale kha a inhliam tak avangin hreh takin a rawn chhuah a ngai a, hliam na erawh a ni lo," tiin goal khungtu chungchang a sawi.

Croatia coach Zlatko Dalic chuan, "Hungary leh Azerbaijan nena kan inkhelh ṭum nen a inang hle. Ṭha takin bul kan ṭan a, beisei angin kan khel ṭha chhunzawm lo. Kan result-ah kan lawm lo a, match tawp ber result-in kan hmalam hun a hril ang," tiin a sawi.

Group E-ah table mawngphah Azerbaijan tih loh ram pali Croatia (14 pts), Hungary (12), Slovakia (10) leh Wales (8) te chu tling leh tla thei vek a ni. Hmahruaitu Croatia-in match khat chauh an nei tawh a, November 16-ah beisei nei Slovakia an hmachhawn dawn - an chak chuan hmahhruaitu an ni ang. Hemi zan vek hian Wales-in Azerbaijan an tlawh dawn a, an chak chuan Euro 2020 kawng a inhawng chhunzawm ang.

Group match hnuhnung ber hi November 19 zanah khelh a ni dawn. Wales-in pahnihnaa awm mek Hungary an mikhual ang a, Slovakia-in Azerbaijan an mikhual dawn. Hemi hunah chauh hian group E aṭanga Euro Championship khel tur a chiang kim dawn.