Kolkata khawpuiah India inlan dawn

FIFA World Cup 2022 qualifier khelin India chu zanin dar 7:30 hian an inlan dawn a, Pathianni zan khan inkhelhna tur hmun Kolkata khawpui an thleng. 

India hian Salt Lake Stadium-ah Bangladesh an lo mikhual dawn a, Qatar inhnehtawkpui thei an nih avangin ṭhenawm ram lakah chak an beisei ngam ang. Football ngainatna hmun Kolkata khawpuia inkhel tur an nih bawk avangin India inkhel turin ngaihven a hlawh a, nimin khan ticket hralh zawh vek a ni tawh!

Blue Tigers hian fans thlawpna an hmu ṭha dawn tihna a ni a, khelmualah anmahni ṭantute an chhanlet ve a ṭul dawn. 

World Cup qualifier-ah India-in match hnih an khel tawh a, point khat an nei - tlang tur chuan Bangladesh hneh a ngai tihna a ni. Igor Stimac enkawl team hi tun thleng chuan an la khel chhe lo. Oman lakah pawh chak thei dinhmunah an ding a, a tawpah vanduaiin 2-1 in an tlawm. 

Blue Tigers tan cho rual loha ngaih Qatar chu Stimac naute hian khualmualah 0-0 in an va inhnehtawkpui a, hei hian nasa takin phurna a siam. Bangladesh-in India an huphurh phah sawt ang tih a chiang - anni hian October 10 khan an mikhual Qatar chu 2-0 in an ngam lo. 

India-in Guwahati-ah ni 10 chhung training an nei a, fan-te tana thu hriat nuam lo tak chu tlarhnung lama rinrawl Sandesh Jhingan a inlan thei dawn lo. Kum 26 mi defender hi India leh NorthEast United-in friendly match an khelh ṭumin a inhliam a, thla ruk tal a chawlh a ngai dawn. 

Blue Tigers ṭantute tana thu hriat nuam erawh international football khel tura Anas Edathodika a lo kir leh ta hi a ni a, Jhingan hmun ruak a luah ang. Anas hi Adil Khan nen an inkawp beisei a ni a, tlarhnung laia inkawp tur chuan thlanawm tak an ni. Bangladesh tlarhma tan a harsa dawn. 

India squad-ah Lallianzuala Chhangte chu Mizo tlangval awmchhun a ni a, Lunglei tlangval hian inkhel bul a ṭan dawn leh dawn loh a la chiang lo. Jeje Lalpekhlua chu a inhliam a la inenkawl mek avangin squad a zawm thei lo a, Hnahthial tlangval hi coach Igor Stimac chuan phone kaltlangin a chanchin a ngaihven reng. 

Mizo Sniper a la awm loh avangin Sunil Chhetri chu tlarhmaah maltlat leh tur a nih a rinawm a, Stimac hian 4-2-3-1 formation hmangin Chhetri hnung chiahah Sahal Abdul Samad a dah rin a ni. Lianzuala a lut lo a nih chuan Ashique Kuruniyan leh Udanta Singh chu mual sir aṭanga nawr tur an nih a rinawm a, Rowlin Borges chu hrem a nih avangin midfield laiah Anirudh Thapa leh Vinit Rai an inkawp ang. 

Bengal Tigers tia hminglem an pek Bangladesh an chhe hran lo a, an captain Jamal Bhuyan hi India hmaa inchhuanna tur an neih chu a ni. 

Danish club ṭha FC Copenhagen youth system chhuak hian Denmark lamah Hellerup IK leh BK Avarta tan pawh a lo khel tawh a, he defensive midfielder hi Indian midfield dah 'nil' turin a pawimawh ang. Bangladesh squad an la naupang tlang a, kum 30 mi midfielder Mamunul Islam hi ram tana vawi 60 inlan tawh niin an squad-a tawnhriat ngah ber player a ni. 

An ram club ṭha Dhaka Abahani Limited tana khel mek hian ISL season hmasa berah khan ATK tan pawh a lo khel tawh a, India rama a tawnhriat hi Bangladesh-in chhawr an tum ang. 

Bangladesh-in qualifier match hnih an khel tawh a, Afghanistan leh Qatar an ngam loh ve ve avangin group E-ah a mawngphah an luah mek. India leh Bangladesh hi tun hmain vawi 28 an lo intawng tawh a, Blue Tigers record a ṭha lawr lak. Vawi 15 a chak zawkah an ṭang a, vawi 11 inhnehtawkin Bangladesh hi vawi hnih chiah an la chak ve - an intawng hnuhnung pahnihah an inhnehtawk ve ve. 

Bangladesh-in India an hneh hnuhnun ber chu 1999 SAFF Championship (1-0) ah daih tawh khan a ni a, record hlui thlirin India an phur ang. Mahse, Bangladesh hi Arsenal academy graduate Jamie Day enkawlna hnuaia khel an ni a, Arsene Wenger entawntu nia insawi coach ho hian an zam dawn lo.