Bencic leh Kenin an chak lo

Dubai Tennis Championships lamah beisei loh result kan hmu, champion lai Belinda Bencic bakah Australian Open champion Sofia Kenin leh seeded pathumna Elina Svitolina te chu hneh nei loin an tla vek.

Thawhlehni zan inkhelah seeded pangana Kenin hi Elena Rybakina nen darkar hnih deuhthaw an inkhelh hnuah 6-7(2), 6-3, 6-3 in a chak lo - Grand Slam nomawi chawi hnua tournament hmasa berah Kenin-i’n beisei a phak lo.

Rybakina erawh tun hnaiah a khel ṭha tluang, kar hmasa mai khan St Petersburg Open-ah final lutin pahnihna a ni. Pathianni zanah inelna an zawh chauh avangin Dubai-ah hian ni khat chauh chawlh nei chungin a kal tlang, winners vawi 25 vaw chhuak zuiin hnehna a chang.

Season hmasa lama pakhatna Bencic-i’n a bul ṭan fuh loh a tuar, inkhel tir lamah a zawna point 19 ngawt hloh zawnin a tawp thlengin a tho chhuak ta lo; a khingpui Anastasia Pavlyuchenkova lakah 1-6, 6-1, 6-1 in a tlawm.

Seeded pathumna Svitolina pawhin beisei a phak bik lo, player langsar lo tak Jennifer Brady chuan Svitolina hi 6-2, 6-1 in a hneh. Brady hian last 16-ah chuan Marketa Vondrousova a hmachhawn leh ang.

Nizan khan Simona Halep leh seeded pahnihna Karolina Pliskova te an inlan a, he thu buatsaih lai hian result kan hre hman lo.