I hriat ngai loh Coco Gauff chu

Tennis ngainatu tam zawk hian season chawhma lam khan Coco Gauff hi an hmelhriat kher lo ang. October thla a thlen meuh chuan American tleirawl hming hi tennis huang chhungah a mikhual tawh lo.

Linz Open final-ah Gauff hian Jelena Ostapenko chu 6-3, 1-6, 6-2 a hnehin nomawi a chawi. Kum 15 mi chauh a la ni a, 1991 hnu lamah chuan American player zingah WTA title la thei naupang ber a ni. Venus leh Serena Williams te khan kum 17 mi an nihin WTA title hmasa ber an la chauh a, an hnampui Gauff lakah American mipui beiseina a sang dawn a, khawvelin engtiangin nge a rawn ṭhan zel dawn tih chu a thlir ṭhup thawh ang.

Tennis inelna hi player zawng zawng tan khelh ngawt theih a ni lo a, a bik takin inelna sang leh lian khelh phak chu a harsa. Linz Open pawh hi WTA International Tournament a nih avangin ranking hniam tan khelh ngawt theih a ni lo.

Maria Sharapova, Justine Henin-Hardenne, Lindsay Davenport, Amelie Mauresmo, Angelique Kerber leh Ana Ivanovic te pawh an lo champion tawhna hmunah Gauff hi main draw atan a tling nghal lo a, qualifier a khelh a ngai.

Qualifying-ah beisei a phak lo a, hnehna a chan zawh loh avangin a thlenna hotel lamah a kir. Beidawng taka a awm laiin phone call a dawng a, tournament a khelh theih tur thu hrilh a ni! Seeded chang phak Maria Sakkari chu hliam vanga a inlan theih dawn loh avangin Gauff tan hmun ruak a awm phah.

Inelna tak an khelh chinah a zam loin a khel a nghet ṭha hle a, final kalkawngah hian world number 8 leh seeded pakhatna ni bawk Kiki Bertens chu straight set-in a hneh, nomawi inchuhna inkhelah Grand Slam champion tawh Ostapenko a hneh leh bawk.

Linz Open champion a nih hnuah Gauff chuan, "Ka tan chuan chawlhkar mak leh danglam tak chu a ni. He hmun hi ka dam chhungin ka hre reng tawh dawn a, season tharah pawh rawn kir leh ngei ka tum ang," tiin a sawi.

Wimbledon khelh zawh takah khan Gauff hi Open Era china main draw in vaw kai thei naupang ber a lo ni tawh a, khawvel barakhaihin fourth round a thleng. An rama khelh US Open-ah khan third round a in vaw kai hial bawk.

Tun ṭum final-a a hmachhawn Ostapenko hi French Open champion tawh a ni a, inkhel boruak sangah a zam lo. Set hnuhnung ber an khelh lai pawhin a hniam zawk ni mah se a buai lo a, tawnhriat nei tlem zawk Gauff a chhaih buai hman hle.

Mahse, Gauff-i pa leh coach ni bawk Corey Gauff chuan a fanu fuihin, "Hahdam rawh, a hmawr bawkna chu tlan thleng kher loin zawi muanga kal thlen tur a ni. I ball vuak fimkhur la, inrintawkna nei chungin hma lam thlir rawh.

"Final a nih avangin helhhawlh lo la, practice-na hmuna nuamti taka i khelh ang khan khel chhunzawm zawk rawh. Dinhmun ṭha takah i ding tawh a, inkhel i thunun bawk, kawng zawh tur a thui tawh lo," tiin a fanu a chak theih nan fuihna thu a hrilh.

London leh New York khawpuiah Gauff hian mipui lawm a hlawh hle a, Austria rama khelh Linz Open-ah pawh ṭantu a ngah hle. A inkhelh apiangin stadium-ah mipui an tam a, ball a vuak dik leh a chet fuh lai chuan thawm a ṭha thei hle a ni.

Florida-a piang Gauff chuan, "Min ṭantu mipui chungah ka lawm, nangni hi ka chakna hnar pawimawh tak in ni. Min thlawpna hnuaia inkhelh a nuam, season tharah pawh hetiang boruak nuam hi tawn leh theih ka inbeisei," a ti.

Lawmthu sawi chhunzawmin Gauff chuan, "Ka chhungkua leh team chungah ka lawm, nangni hian ka kawng zawh tinrengah min puiin ka ke pen tin hi min venpui a ni," tiin a hlawhtlinna a chan theih chhan chu chhungkua leh team vang a nih thu a sawi.

Linz Open champion a nih vangin Gauff hian Rs 30,54,096 a dawng a, tunah hian Roger Federer leh hun rei tak chhung a agent lo ni tawh Tony Godsick ten an din Team 8 nen thawhhona an nei mek bawk.

A thuamhnaw hi American company lian New Balance lamin an siamsak tawh, a T-Shirt ah chuan "Call me Coco" tih an ziahsak a ni. Ram hausa leh changkang US mi a ni a, an rama infiamna an ngainat tak tennis khel thiam a nih bawk avangin infiamna pawn lam aṭang pawhin sum tam zawk a lakluh a rinawm.

Inelna neih ṭan hma kha chuan Gauff hi world ranking lamah 110-na a ni a, tun kara ranking chhuak tharah chuan a sang 75 zingah a tel phak tawh ang. Tun ang zela hma a sawn chho a nih chuan nakkum January thlaa khelh tur Australian Open-ah main draw a tan a tlin theih beisei a ni.

American tleirawl hi tun hmain Roger Federer-a'n fuihna thu a lo hrilh tawh a, chumi chu a hriat reng thu a sawi. Swiss star hian 'Pawn lam boruak leh thu puarpaw lengah buai suh,' tiin tennis khelh chauh ngaihtuah turin a lo ti tawh.