Lakshya Sen tan BWF title hmasa ber

India tlangval badminton khel thiam Lakshya Sen chuan BWF World Tour title hmasa ber a vaw chhuak ta. Pathianni khan Yusuke Onodera hnehin Dutch Open-ah mipa singles champion a ni.

BWF World Tour Super 100 tournament zinga pakhat Dutch Open final-ah kum 18 mi Lakshya hian 15-21, 21-14, 21-15 in hnehna a chang, chak tur hian darkar khat leh minute thum zet hun a mamawh. Tun dinhmunah Lakshya hi world number 72 a ni a, thla hmasa mai khan Belgian Open-ah a lo champion tawh bawk. Season kal laiah Polish Open final a khel tawh bawk a, sulhnu ṭha a hnutchhiah zel a beiseiawm hle.

Asian Junior champion hian nikum khan Youth Olympic-ah silver medal a la tawh a, World Junior Championships-ah bronze medal a lak tawh bawk avangin Indian shuttler chhuak thar zinga hmabak nei eng bera ngaih a ni.