Fury-a'n Strowman a hmachhawn dawn

Boxer rothap Tyson Fury chuan WWE ring chhung a rap dawn ta a, Braun Strowman nen October 31 khian Saudi Arabia-ah an inhmachhawn ang. 

Kum 31 mi Fury hi WWE show-ah vawi hnih a inlan tawh a, hetah hian a storyline tur chu ṭan tawh niin Strowman nen an intibuai a ni. Fury chuan, "Hlauh ka nei lo. Strowman hi ka knockout dawn a ni," tiin a hmaa ding tur wrestler rothap chu a vau lawk. 

A hming tak Adam Scherr, 'Strowman' tia koh wrestler chuan hei hi chhangletin, "Tyson hian hei hi lo hre rawh se, WWE-ah chuan glove kan bun ve lo," a ti. Fury chuan WWE-a a hming a nem kai ve thei tur chu a lawm thu a sawi a, sports entertainment organisation lar tak fan ruhkawl a nih thu a sawi. 

British boxer rothap inlan zanah hian WWE champion Brock Lesnar pawh a inlan dawn a, UFC heavyweight champion hlui hian UFC fighter Cain Velasquez a hmachhawn dawn a ni. WWE executive Triple H chuan, "WWE, UFC leh boxing khawvel chu hmun khatah kan khung khawm dawn a ni," tiin Riyadh-a an hun hman tur chungchang hi a sawi.