Netherlands leh Germany an chak

European Championship 2020 qualifier-ah Pathianni zan khan Netherlands leh Germany ten an khingpui Belarus leh Estonia te an hneh a, match hnih khelh hmabakah ram lian pahnih hi final round lut turin an dinhmun a ṭha. 

Poland-in North Macedonia hnehin group G hmahruaitu niin an inpetling. Group I-ah Russia-in Cyprus 5-0 in an sawp a, Belgium hnung zuiin final round an lut ve bawk.

Netherlands-in Stadyen Dynama-ah Georginio Wijnaldum hmangin first half-ah goal hnih khung mah se mualneitu Belarus-in Stanislaw Drahun hmangin minute 53-naah siphurh an sut ṭhen. Dutch defender Virgil van Dijk-a'n a tihtur a ti tawk lo.

Ronald Koeman hoten chak an phu nachungin awlsam takin hnehna an chang lo. Netherlands manager Koeman chuan, "First half kan khel ṭha a, second half-ah erawh kan inthlahdah hret. Rilru nuam taka awm turin goal kan mamawh belh laiin goal thumna khung theihna hun ṭha kan insiam thei lo," tiin a sawi.

Netherlands hian Belarus hma hian an elpui Northern Ireland chu 3-1 in an hneh hram a, point ruk hlu tak an hlawhchhuah avangin Euro C'ship 2020-ah an inlan ngei a rinawm.

Tallinn, Estonia-ah mikhual Germany midfielder Emre Can chu minute 14-na lekah hnawhchhuah ni mah se player 10-a khel chungin Joachim Low hoten Estonia 3-0 in an hneh. Germany hian second half-ah goal an khung chauh a, Ilkay Gundogan-a'n goal hnih khungin Timo Werner-a'n goal khat a khung ve bawk.

Joachim Low chuan, "Thil thlen dan thlirin yellow card a ni thei lo a, red card ngei tur a ni. Player 10-a khelh hnuah insiamrem a ṭul a, goal chhuah loin goal thum kan khung a, kan result-ah kan lawm hle," tiin a sawi.

Netherlands-in November 10 zanah Northern Ireland an tlawh dawn a, Koeman-a hoten hnehna an chang a nih chuan Belarus mikhual tur Germany nen group C aṭangin final round an luh a rinawm. Northern Ireland hi an chak a nih thung chuan group match hnuhnung berah Euro 2020 khel tur a chiang chauh ang.

Group match hnuhnung ber hi November 19-ah khelh a ni dawn. Germany-in Northern Ireland ang mikhual ang a, Netherlands-in an mualah Estonia an hmachhawn ang.