An ropuina ramah Liverpool an tlawm

June 2019-a Liverpool-in Champions League nomawi an chawina hmun chu Wanda Metropolitano Stadium a ni a, he khelmual hi Merseyside club ṭantute thinlungah a cham reng tawh ang. 

Thawhlehni zan khan hlimna vawrtawp an tawnna hmunah Liverpool fans an nguai a, Champions League round of 16 first leg-ah Atletico Madrid chu 1-0 in an ngam lo. 

Atletico tan Saul Niguez chuan inkhela goal awmchhun hi a khung a, minute 90 chhunga target-a 'shot' nei lo Liverpool-in a chhan letna tur an neih loh avangin an tlawm. Liverpool manager Jurgen Klopp chuan, "A la tawp lo, chu zawng chu ka ngaihtuahnaa awm a ni," a ti a, March 11 zana Anfield-a second leg an khelh tur a thlirlawk.

Premier League-ah Liverpool-in ro an rel a, European champion ni lai an ni bawk. Atletico erawh tun hnaia beisei ang result nei thei lo an ni a, Liverpool chu rin hlawh zawk an ni. 

Mahse, minute linaah football mawina hmuhtir kan ni a, rin hlawh lo zawkin goal an khung hmasa. Atletico corner pet aṭanga ball kalin Fabinho ke a per hnuah Saul Niguez-a ke bulah a tla a, goal-ah a chantir nghal. 

Atletico-in an beisei aia hmaah goal an khung a, defensive thiam hmingthang Diego Simeone-a'n a naute a khelhtir dan turah rinhlelh tur a awm lo. 

Reds-in theihtawp chhuah chhunzawm mah se ṭum danga Liverpool ang an ni phak lo a, Sadio Mane, Mohamed Salah leh Roberto Firmino te pawh player naran mai an ni. 

Jurgen Klopp-a hnuaiah Liverpool game a hmuhnawm ṭhin. Players an taima a, an tlan tam a, pressure an pe na a, a tawpah goal an khung leh nge nge ṭhin - chu chu heavy metal football an ti. 

Simeone-a hnuaia game erawh 'Cholismo' tia koh a ni a, counter attack-ah innghatin tlarhnung phui chu thupui ber a ni - Thawhlehni zanah cholismo mawina kan hmu a, Klopp aiin Simeone-a dingchang. 

Atletico-in goal an khung tawh tih hriain tlarhnungah an bet thlap a, midfield-a Liverpool chetsual changa nawr thut chu an tum a ni - a bet zawk anga lang chungin Reds aiin an hlauhawm zawk. 

Midfield-ah Georginio Wijnaldum, Jordan Henderson leh Fabinho ten an theihna angin an khel chhuak lo a, mual sir aṭanga Liverpool goal nawr tur Sime Vrsaljko leh Renan Lodi ten an dang hneh a, midfielder Thomas Partey chuan tlarhnung laia Stefan Savic leh Felipe a pui ṭha hle bawk. 

Jurgen Klopp-a'n Thawhlehni zanah Atletico an lenchilh zui dawn tih inhre sain Inrinni zan Premier League-ah a player neih ṭhat dan berin squad a rem a, Reds player-te an chau ve deuh niin a lang. 

Norwich lakah hliam damkawr Mane chu bench aṭangin a luhtir 'ṭalh' a, chakna goal khung ngei mah se Atletico laka a khelh dan enin chawl hahdam zawk se a fuh zawka rinna a awm. 

Salah leh Firmino te an 'nung' tawk lo a, bench aṭanga luhtir  Divock Origi leh Alex Oxlade-Chamberlain ten ṭum dang an phak bik lo. 

Atletico tan striker Alvaro Morata hriam deuh se goal khat aia tam khung thei an ni a, hun tawp dawna hun ṭha khawhraltu Diego Costa pawhin duh aiin ngaihtuahna a seng lo hret. 

Stadium kan pan khan hnehna kan chang ṭan der tawh. Football mawina kan hmu a, mipui leh player-te an ṭangrual tlat a ni. Atletico-a kum riat ka awm chhungin khatiang ang renga thlawpna ṭha kha ka hmu ngai lo a, rilru a 

khawih takzet. 

Khawvela team ṭha berin min rawn lenchilh a, kan lo hneh a ni. Mahse, game khat a la awm tih hriat tel a ṭha a. Liverpool khan chance pawh an nei a, an hlauhawm ṭhin takzet. Khawi hmunah pawh khan player ṭha an kawl a ni. 

Result-ah lungawi lohna ka 

nei lo. Atletico hlim hmel ka hmu a, hnehna ropui tak a nih avangin a awm pawh ka ti. Fan-te khan an team puih an duh a, chu chuan thahrui a pe a ni. Mahse, second 

leg kan la nei alawm. 

Atletico fans, ticket changte hnena ka sawi duh chu, 'Welcome to Anfield," tih hi a ni. Anfield boruak sanzia vawi tam kan sawi tawh a, tunah 1-0 in hma hruai mah se second half chu Anfield-a kan khelh dawn avangin kan boruak an tem ve ang.