Welcome to 700 Ronaldo

Cristiano Ronaldo chuan a football career-a a goal 700-na a khung a, Ukraine lakah Portugal chakpui zo lo mah se result aiin a goal khung hi sawi hlawh zawk a ni. 

Andriy Shevchenko enkawl Ukraine-in hnehna an chan avangin Euro 2020 khel turin an tling a, a pawi zawk erawh Ronaldo record siam zan leh an chak hun a innang a, fak tur angin fak an hlawh tawk lo. Group B aṭanga Ukraine an tlin laiin Portugal (11 points) leh 2-1 a Lithuania hnehtu Serbia (10) chuan match ruk ve ve khelin an inhlat lo a, Ukraine hnung zui turin an inum zel ang. 

Ukraine-in Roman Yaremchuk leh Andriy Yarmolenko hmangin goal an khung hmasa a, minute 72-naa Taras Stepanenko handball vangin Ronaldo hian penalty aṭangin a goal 700-na a rawn khung. 

Stepanenko hian a yellow card pahnihna a hmu a, hnawhchhuah a ni bawk. Mahse, Portugal-in goal dang an zawng hmu zo tawh lo - Ronaldo hian ram leh club tana goal 700 khung tling tur hian match 973 bak a mamawh lo. 

Portugal tan goal 95-a khung tling ta bawk a, ram tana goal khung hnem ber ni turin Iranian legend Ali Daei (109 goals) chiah a phak tawh lo. 

Ronaldo hma hian ram leh club tana goal 700 khung tling thei panga chiah an awm a, Czech-Austrian striker Josef Bican (805 goals), Brazil legend Romario (772), Pele (767), Hungary legend Ferenc Puskas (746) leh Germany legend Gerd Muller (735)-te an ni. 

Real Madrid chu Ronaldo chhawr bertu niin goal 450 a khungsak a, Manchester United tan goal 118 a khungsak hman bawk. Sporting Lisbon tan goal nga a khung a, Juventus tan goal 32 a khung tawh. Ram bikah Andorra, Armenia, Latvia leh Sweden lakah goal nga ṭheuh khungin a khung hnemna ber an ni a, France, Germany, Italy leh England lakah a la khung miah lo thung. Club lamah chuan Sevilla (27), Atletico Madrid (25), Getafe (23), Celta Vigo (20) leh Barcelona (18)-te chu Ronaldo goal khung theih tuartu an ni.