Olympic-ah Federer inlan dawn

Roger Federer chuan season thara a hun hman dan tur ruahmanna a siam a, chung zingah chuan nipui laia khelh tur Tokyo Olympic-ah a inlan dawn, tun hma lama a la hlawhtlin theih lohna hmunah hian mipui en bik a ni leh ang.

Grand Slam vawi 20 champion tawh Federer hian Olympic bikah chuan singles huangah gold medal a la dawng ngai lo. 2012 khan London-ah final lut mah se Andy Murray a hneh lo a, silver medal a hlawh chhuak.

Nakkuma Olympic an neih hunah chuan Federer hi kum 39 a ni tawh dawn, 2016-a neih Rio Olympic-ah khan khup hliam vangin a inlan thei lo. Beijing 2008-ah erawh kha chuan Stan Wawrinka nen doubles-ah gold medal an la tawh.

Switzerland thiam-puipa Federer chuan, "Ngun taka kan ngaihtuah hnuah Olympic Games khel turin thutlukna ka siam. Kei leh ka team chuan nakkum Wimbledon leh US Open inkara ka tih tur kan ngaihtuah nasa hle. "Athens leh Beijing-ah khan kan ram Switzerland puanzar (flag) kengtu ka lo ni tawh a, gold medal leh silver medal kan la, inelna ka hmachhawn leh tur hi ka lawmin ka phur tawh hle a ni," a ti.