Neymar a chawl rei dawn

Paris Saint-Germain striker Neymar chu Brazil tana a inlanna hmunah a hliam a, a malpui vei lam hliam vangin chawlhkar li chhung vel chu inkhel thei loa a chawlh a ngai dawn a ni.

Footballer manto ber Neymar hi Brazil leh Nigeria ten friendly match an khelh ṭumin minute 12-na lekah thlak a ni. Ligue 1 bakah Club Brugge nen Champions League group match vawi hnih an khelh turah a inlan thei lo ang.

French champion PSG chuan thuchhuah siamin, "Neymar hliam endik a ni a, tuna a lan danah chuan kar li chhung vel a chawlh a ngaih hmel. Ni riat hnuah a hliam hi endik leh a ni ang, a rawn kir hun tur tak hi a hliam dam chak dana zirin a la danglam thei ang," an ti.

Barcelona forward hlui Neymar hi nipui laia transfer boruak leh Copa America inbuatsaih laia hliam vangin season tir lamah PSG tan a inlan lo, tun hnaiah a khel thei ve leh ṭan chauh a ni a, mamawh lai taka hliam a nei leh hi Paris club tan hriat a nuam lo ang.