Hmangaih berte lenna Kolasib lam hawi ila...

Mizoram Premier League boruak a 'hot' chho ṭan a, round rukna chu hla phuahthiam leh zaithiam Zorock-a'n, "Hmangaih berte lenna Kolasib," tia a lo chawi khawpuiah ngei khelh a ni dawn ta. 

Football vanga hriat hlawh ṭhin Kolasibin Mizoram football inelna lian thlen an inpeih tawh a, MPL club-ten an hmaah ropuina leh mualphona a inchhawp tih hriain Kolasib an pan dawn. Kolasib khawpuia MPL khelhna tur hmun khelmual hi tun hma chuan 'Venglai Field' tih ṭhin a ni a, mahse sorkarin phul lem phah a, stadium changtlung ni tura a siam hnuah 'Kolasib District Sports Stadium' tia a hming thlak a ni. 

Stadium awmna hi Project Veng a ni a, a awmna a laili avangin Kolasib khawi hmun aṭang pawhin pan a harsa lo - October 18 & 19-ah inkhel a awm ang.  

Kolasib hi Mizoram khawpui ber Aizawl aṭangin 83 km a ni a, Sairang 'road' leh tlang kawng tia sawi Durtlang lam aṭangin kal theih ve ve a ni. 

Hriat tel atana ṭha erawh Sairang kawng lam hi tlan ngam loh khawpin fur ruahtuiin a ching chau a, MPL en tura Kolasib pan tum tan Durtlang lam aṭanga kal a fin thlak ang.  Aizawl - Kolasib inkar hi darkar thum leh a chanve vel lekah thlen theih a ni a, two wheeler-in darkar thum bak hun hman a ngai lo tlangpui. 

A tawi zawnga sawi chuan Kolasib leh Aizawl inkar hi 'lenna' tham lek a ni a, mahni club ṭante an hawihil lutuk loh nan MPL club fans ruhkawl tan chuan mahni inluma lo awm ngawtna chi a ni lo. 

Chawhma lam inkhel en duha zingkara Kolasib lam pan tan Lungdaiah chaw eina hotel a lo intlar tuarh ang. Lungdai-a rilṭam hman lo tan Kawnpui pelh hret, Bualpuiah a inhnangfak theih a, Kolasib-ah pawh hotel a awm nual tih hriat a ṭha. 

Kolasib-a zan riak duh si chhungte nei lo tan pawh hotel riahna tur a awm nual. Aizawl aṭanga kala Kolasib khaw tawntirh lam Vengtharah Tourist Lodge leh SIRD Guest House a awm a, Khuangpuilamah Rokhum Villa a awm bawk. 

Stadium hnaih lama thleng duh tan Venglaia Pui Pui Villa pan a fuhin a rinawm a, Diakkawna Mizo Hotelpui, Hotel cloud nine leh Banglakawna DC Circuit House aṭang pawhin panna a hla lo. 

Mahnia lirthei keng lo tan pawh veivahna a hautak hran lo a, auto rickshaw leh taxi an awm reng - hotel kan tarlante aṭanga stadium panna hi sum inchawi ṭawmin Rs. 100 aiin a sang lo vek ang. 

Mahni lirthei keng kher loa Kolasib kal duh tan pawh Aizawl aṭanga Kolasib pan a hautak lo - darkar tin Kolasib pana tlan an awm a, Kolasib aṭanga Aizawl pana tlan chhuak darkar tin a awm bawk!

Zan riak hman loa inkhel en duh tan pawh zing kar dar 6:00-a Kolasib pan turin sumo a awm nghal a, tlai dar 5:00-a Aizawl pana kir lehnghal duh pawhin Kolasib aṭangin sumo chhuak a la awm cheu. Aizawl aṭang chuan  Millenium Centre opposite-a sumo counter-ah ticket lain a chhuah nghal theih a, Bawngkawnah Kolasib pana chhuahna sumo counter a awm nual bawk. 

Sumo-a Kolasib pan hian a tlangpui thuin darkar thum leh a chanve aṭanga darkar li inkar an tlan tlangpui a, chauhna hman a awm lo. 

Kolasib hian Mizoram mai ni lo national huapa hming chher footballer a lo nei nual tawh a, chung zingah chuan PC Lalawmpuia (Tuaitea), Vanlalrova leh Achhuana Vanchhawng te chu hriat hlawh zual an ni ṭhin. 

Inkhelhna tur stadium awmna Project veng tlangval Tuaitea hian Mohun Bagan-ah a thiam thil a lo pholang tawh ṭhin a, Rova hi Churchill Brothers-ah player pawimawh a lo ni tawh a, Navy lama lut ta Achhuana hi Subroto Cup-a a hming a chherzia kan la theihnghilh loin a rinawm. Kolasib tlangval Achhuana hian Leicester City kawr hain Liverpool rawltharte a hmachhawn tawh a, nimin lawk emaw kan tih kha hre lo an tam tawh khawp ang.

KFC leh PHE inhal vanglai kha Kolasib-a local football boruak nun vanglai a ni ṭhin a, Tremendous leh Friends club te pawh kha Kolasib football boruak chawi nungtu an ni. Tualchhung footballer Tlanmawia, Mareltea, Dennis-a, Mapuia, Vardinga, Joseph-a, Ni-a, RLT-a, Manunga leh Ramhluna te ho thiamzia kha Kolasib football ngainatu chuan an theihnghilh lo ang. 

Hun engemaw chen chu Kolasib-ah tualchhung football-a thi hman a, tun hnaiah 'football khawpui' tih ngata inchhal ngam khawpui hi tualchhung football-ah an harh leh ṭan ta. Project Veng FC chu team tlo ber pawl niin an la ṭang mar reng a, tun hnaiah fans ngah Kolasib Football Club (KFC) an intuai thar leh mek bawk. 

Hetianga Kolasib football boruak a nun vanglai takin MPL khelh a ni dawn a, Kolasib football ngainatute tan 'Mizoram level'-ah an tualchhung football chu eng ang chiah nge a nih hriatna leh hmuhna remchang a ni - Kolasib mipui tan October 18 & 19-a stadium pan mai a fuh ang. 

Chanmari FC hi MPL ṭan hmaa Project Veng FC nena charity match lo zuk khel tawh kha an ni a, an vannei dawn - stadium awmna veng Project mipuiin an ṭan rawn dawn.