BCCI president thar Ganguly

Kum 65 hnuah India rama cricket thuneitu sang ber Board of Control for Cricket in India (BCCI) chu cricketer hlui kaihhruaina hnuaiah an awm dawn a, batsman ropui Sourav Ganguly chu BCCI president thar a ni.

Kum 47 mi Ganguly hi cricketer hlui zinga BCCI president ni thei pahnihna a ni a, Maharajkumar of Vizianagram chuan 1954–1957 khan president hna hi a chelh tawh. Batting legend Sunil Gavaskar leh off-spinner Shivlal Yadav te pawhin kum 2014 khan BCCI president hna hi chelh tawh mah se anni erawh Supreme Court rorelna vanga chelh an ni.

BCCI president chuh tur hian Thawhṭanni thleng khan BCCI headquarters, Mumbai-ah hming a thehluh theih a. Ganguly chiah hian hming a pe lut a, Dada hi BCCI leh ICC hotu hlui Niranjan Shah leh N Srinivasan ten an ṭawiawm.

Ganguly kaihhruai BCCI-ah hian union home minister Amit Shah fapa Jay Shah chu secretary a ni dawn a, BCCI president hlui Anurag Thakur unaupa Arun Dhumal chu treasurer a nih a rinawmin post paruk zinga pathum dang hi Mahim Verma, Jayesh George leh Prabhtej Singh Bhatia ten an hnawhkhat ang. BCCI hruaitu tharte hian October 23-ah office an luah ṭan ang.

India captain hlui Ganguly chuan twitter-ah thlalak tarlangin, “BCCI-a team thar. Kan thawhho ṭhat ngei ka beisei. Anurag Thakur tun hun i hmuh thleng avangin ka lawm e,” tiin a ziak. He thlalakah hian Anurag Thakur, Jay Shah, Arun Dhumal leh Jayesh George bakah Cricket Association of Mizoram (CAM) general secretary Mamon Majumdar pawh a tel a ni. 

Mizoramin cricket-a hma an sawn theih nana hmalatu pawimawh Mamon leh World Cup vawi hnih inlan tawh (1975 & 1979) Brijesh Patel ten IPL Governing Council Member ni turin an chuh ve bawk. BCCI vice-president leh IPL chairman hlui Rajiv Shukla chuan, “Nihna pawimawh paruk leh IPL Governing Council-a nihna hmunruak pahnih hi chuhtu dang an awm lo. Ganguly leh a hote hian BCCI hnuaia full member 90% aṭangin thlawpna an hmu bawk,” tiin a sawi a, BCCI hruaitu zingah CAM hruaitu a tel ve ngei a rinawm hle.

BCCI president thar Ganguly chuan, “First-Class cricket chu ka ngaih pawimawh ber  a ni chhunzawm ang. Ka thawhpuite nen kan theihna zawng zawng chhuahin BCCI ropuina neih let leh kan tum dawn a ni,” tiin ramchhung inelna a dah pawimawh tur thu a sawi.

BCCI hruaitu hlui Jagmohan Dalmiya chuan, “Tum sang tak a nei a, cricket a hriat chian bawk avangin amahah hian theihna sang tak a awm,” tiin Ganguly lakah beiseina a neih san thu a sawi.