Denmark lamah Sindhu inlan dawn

Badminton world champion PV Sindhu chu tunkar chhunga khelh tur Denmark Open-ah a inlan dawn a, Indian shuttler dangte pawh BWF World Tour-ah hian an hmel hmuh tur a awm bawk ang.

August thla khan Sindhu hi World Championships-ah a champion a, a hnu lamah erawh result a nei ṭha tawk lo. Thla hmasa khan China Open leh Korea Open-ah quarterfinal pawh thleng zo loin a tla. World number 6 Sindhu hian season kal laiah BWF World Tour title a la hlawh chhuak lo, a match hmasa bera a hmachhawn tur Gregoria Mariska Tunjung hi vawi nga a hneh tawh a nih avangin a huphurh hran lo ang.

World number 8 Saina Nehwal pawhin January thlaa Indonesia Masters a lak hnuah hlawhtlinna chan leh a beisei. London Olympic bronze medalist hi season hmasa khan finalist a ni a, world number 12 Sayaka Takahashi nen an inkhel nghal dawn.

Mipa singles lamah tun hma lama champion tawh Kidambi Srikanth chuan khawtual tlangval Anders Antonsen a hmachhawn dawn a, world number 1 hlui hi tun hnaiah a khup hliam vangin a inkhel tam lo. Antonsen hi 2017 World Championships-ah khan a hneh tawh avangin inrintawkna a nei ang.

Mahse, world number 4 Antonsen hi zuam sual theih tur a ni. Indonesia Masters, Barcelona Spain Masters leh European Games-ah te hlawhtlinna a chan tawh bakah Indonesia Open Super 1000-ah te final a lut tawh bawk.