Auh nawmnah karah England chak

Bulgaria fan-ten nawmnah takin England player-te au mah se Three Lions hahum ri chhem dai turin a tling tawk lo a, Gareth Southgate naute hi 3-0 in an chak. 

England tan Raheem Sterling leh Ross Barkley ten goal hnih ve ve an khung a, Marcus Rashford leh Harry Kane ten goal khat ve ve an thawh bawk. Kosovo-in 2-0 a Montenegro an lo hneh ve avangin Three Lions hi Euro 2020 khel turin an la tling chiang lo a, November-a qualifier khelh leh hun an nghah phawt a ngai. 

Hetihlai hian world champion France chu Turkey-in 1-1 in an chelh a, group H aṭanga tlang turin France pawh hian an nghah ve leh phawt a la ngai dawn a ni. 

Bulgaria ramah chi inthliarna a nasat avangin Three Lions-in an zin hma aṭang tawhin hlauhthawnna an nei a, Tammy Abraham chuan hmuhsitna an tawh chuan khelmual an chhuahsan tur thu hial a sawi. 

Rin lawk angin Bulgarian fans an che a, minute 28-naah a vawi khat nan inkhel tihtawp a ngai hial. Match official-ten UEFA dan an sawi thar leh a ngai a, rei tak an sawi ho hnuah inkhel an ṭan leh. Mahse, chawlhlawk hman hmain inkhel tihtawp leh a ngai a, England an talbuai phah loh tih lantirna chu goal a ni - first half chhungin goal li an khung der tawh!

Minute sarihnaah Rashford-a'n a khung a, Barkley-a'n (20', 32') goal hnih a rawn khung karah Bulgarian fan-te hmuhsit Sterling chuan goal lina a khung. 

Bulgarian fan-ten vunrawng inhmuhsitna tih tawp an tum lo a, England-in goal khung tawp san an tum bik lo. Sterling leh Kane ten second half-ah an khung leh a, chiang takin Three Lions an chak. 

Levski Stadium-ah hian Bulgarian fan-ten Kosovo leh Czech Republic an mikhual ṭumin nungchang mawi lo an lo chhuah tawh a, tuna England an mikhual pawh hian mi 5,000 ṭhutna section pakhat chu khar a ni. Bulgarian fan-ten vunrawng inhmuhsitna an lantira an hriatsual chu England tibuai loin an player-te zawk an tibuai tih hi a ni a, Bulgaria an khel chhe takzet. 

Captain Ivelin Popov leh player dangten an fan-te chu duhtawk tura an ngen an ngai hial a, tunah chuan chak lo bawk, UEFA hremna nghak bawkin an awm ta. 

World champion-in goal an khung loh reng hnuah bench aṭanga luhtir Olivier Giroud chuan Antoine Griezmann corner aṭanga ball kal chu a tauh lut a, minute 76-na a nih avangin chak an inbeisei. 

Mahse, Turkey-in an mikhualna ramah tlawm an tum bik lo. Kaan Ayhan chuan minute nga hnuah si phurh sutna goal a rawn khung a, hun tawp thleng goal dang a lut zui lo. Chelsea striker Giroud-a'n ram tan match 92-ah goal 38 a khung a, ram tana goal khung tam lama pathumna a ni - pahnihna Michel Platini (41 goals) a hnaih tawh hle. 

Iceland-in 2-0 a Andorra  an hneh avangin France leh Turkey an la tling lo ve ve a, match riatah point 19 an nei a, Iceland-in point 15 an nei thung - November-ah engkim a chiang ang.