Mizo footballer thiam Zohminga Zote a thi

Mizo football history-a hming dai tawh lo tur, Zohminga Zote chu nimin tlai dar 2:30 khan NEIGRIHMS Hospital, Shillong-ah kum 64 mi niin a thi.

Zohminga Zote hi Mizo footballer zinga ball thiam hmasa a ni a,  Mizoram team leh a khelhna Mizoram Police (1st Bn MAP) tan sulhnu ṭha tak a hnutchhiah. Lammuala mipui pung khawm hmaah 80s chho daih tawh khan tunlaia an ngaihsan 'step over' leh 'feint' te hi a lantir daih tawh! Mizoram deng chhuakin a thiamzia hi an sawi ṭhin.

Mizoram tan pawh  vawi tam a feh chhuak tawh a, a thiamzia nemnghettu chu a hming chawiin Lammualah ṭhutna (Stand) hming a awm hial. Zohminga Zote hi MPS retired a ni a, nimin khan Aizawl panpui nghal niin vawiin hian a chenna Armed Veng South-ah vui liam a ni ang.