FIFA Under 17 Women's World Cup Guwahati-ah a hawnna neih a ni dawn
FIFA Under 17 Women's World Cup hawnna chu November 2 khian neih a ni dawn a, Guwahati khawpuiin a thleng ang.
November 21 thlenga neih tur inelna hi Guwahati bakah Bhubaneswar, Kolkata, Ahmedabad leh Navi Mumbai te chuan an thleng dawn a, final hi Navi Mumbai-ah khelh tur a ni.
Kum 17 hnuai lam hmeichhe team inelnaah hian ram 16 an tel dawn a, group paliah team pali zel awmin ṭhen hran an ni ang a, group tina a sang pahnih chu quarterfinal khel turin an tling ang.
All India Football Federation (AIFF) president Praful Patel chuan, "Kum 2017-a FIFA Under 17 Men's World Cup kan thlen khan kan theihna kan pholang tawh a, professional takin engkim kan kalpui.
"Vawiina kan hun tawn pawh hi Indian football tan hlawkna ropui tak a ni ang tih ka ring a, mipa leh hmeichhia intluktlanna hi um bo mai theih a nih lohzia pholanna ramchang a ni bawk ang," a ti.
FIFA Chief Women's Football Officer Sarai Bareman chuan, "Indian football tan bung thar kaina a ni. He inelna aṭang hian zir tur a neihte India chuan a zir ka duh takzet a, tournament thupui 'Kick Off The Dream' pawh hian hmeichhe football hmasawnna tura kan duhna te a pho chhuak hneh hle a ni," tiin a sawi.
Union Sports Minister Kiren Rijiju pawhin India chuan football ṭhanzelna hmun ni turin theihna a neih thu a sawi a, school leh college ten hmeichhe football team an neih vek a duh thu a sawi tel bawk.
Inelna neihna turte
Stadium Khawpui
Indira Gandhi Athletic Stadium Guwahati
DY Patil Stadium Navi Mumbai
Salt Lake Stadium Kolkata
TransStadia Stadium Ahmedabad
Kalinga Stadium Bhubaneswar
Ni pawimawh
Opening match November 2
Quarterfinal November 12 leh 13
Semifinal November 17
3rd/4th place play-off & Final November 21