Bengaluru tan beiseina a chuai

Pathianni zan Indian Super League inkhelah Bengaluru chuan 1-1 in Odisha FC an inhnehtawkpui a, league match sarih chhung chu a zawnin hnehna an chang zo tawh lo. 

Odisha nena an inkhelah pawh Diego Mauricio chuan minute riatna lekah goal hmahruai a khung a, Bengaluru an hawihai - hun tawp nan minute riat chauh a awm tawh tihin Erik

Paartalu chuan si phurh sutna goal a rawn khung a, table mawngphaha awm club lakah point an hlawh chhuak hram.

Bengaluru hian January 6 khan beisei ang result an neih theih loh avangin an coach Carles Cuadrat chu a hna aṭangin an chawlhtir tawh a, a hmun ruak luah tur hian  Naushad Moosa chu coach lailawk turin an ruat.

Mahse, Indian coach enkawlna hnuaiah pawh eng ruai an ang lo a, Air India boss hlui hnuaiah hian league match li khel tawhin chak an la nei lo - vawi hnih draw result neiin vawi hnih an tlawm!

Bengaluru boss Naushad Moosa chuan, "Thil hi a nihna ang taka sawi a ṭul a, league round-a pakhatna nih chu beisei chi a ni tawh lo. Mahse, playoff erawh beisei thei kan la ni a, ATK Mohun Bagan leh Mumbai City an fal deuh tih loh chu club tin hi kan la inhnaih em em vek a ni," tiin beisei an la neih thu a sawi. 

Odisha tan Jerry Mawihmingthanga leh Daniel Lalhlimpuia ten inkhel bul an ṭan a, Chanmari tlangval Jerry-a'n goal khung theihna remchang vawi hnih ngawt nei mah se Bengaluru keeper ṭha mi Gurpreet Singh Sandhu chuan ṭha zetin a dansak ve ve. Serchhip forward Daniel-a'n chance duhawm a nei ve bawk a, mahse, Mizo striker vanneih zan a ni lo. 

Pathianni zan ISL inkhel dangah Jamshedpur leh Hyderabad chu goal khung loin an inhnehtawk a, JFC tan Ricky Lallawmawma chuan inkhel bul a ṭan.