Match 10 chak zawn tawh Man City inlan dawn
Zanin dar 1:45 hian Premier League champion rinkai Manchester City-in tla thei dinhmuna ding West Bromwich Albion an tlawh dawn. The Hawthorns-ah match hnuhnung 10-a chak vek thei Pep Guardiola hote chak tura rin an ni a, amaherawhchu an khingpui Baggies boss hi Sam Allardyce a ni.
Manchester City hian hnehna an chan theih chuan khelh zat inangah Premier League hmahruaitu an ni dawn. Pep-a hote hian league match hnuhnung bera Aston Villa an hneh zawh khan hun rei lote chhung chu a chung berah an awm a, an elpui Manchester United-in Fulham an hneh zui avangin pahnihnaah an awm leh rih.
Buaina chu
Table aṭanga thlirin Man City khingpui an nem chho a, West Brom zawhah pawh Sheffield United leh Burnley te an hmachhawn dawn. Pep-a hote hi awlsam taka chak chho tura ngaih an nih laiin an match hnuhnung bera League Two club Cheltenham Town nen an inkhelh ṭum pawhin harsa takin hnehna an chang.
Man City hi an khingpuiten team ṭha tih an pawm a, defensive game an khel ṭhin. Pep Guardiola leh player manto rual tan pawh goal venhim tawp tum laka goal khung a a harsa a, tun season-ah an striker chhuanvawr Sergio Aguero hliam vanga an chawr mumal thei loin harsatna a belhchhah bawk.
Pep-a hoten chanchin ṭha lo dang an hriat belh a, game siamtu ber Kevin de Bruyne-a chu hliam vangin kar li aṭanga kar ruk a chawlh a ṭul dawn. Man City tan goal venhim tuma khel tur West Brom paltlang a harsa ang.
Baggies hi
West Brom hian December 15 khan Etihad Stadium-ah Manchester City an chelh a, result ṭha bik ni mah se coach Slaven Bilic an ban. Big Sam-a hnuaiah league match vawi ruk khel leh tawh a, vawi li chak loin vawi khat chiah an chak.
Sam Allardyce-a hnuaiah Baggies hi Hawthorns-ah an che chhe hle. League match hnuhnung pathumah goal an khung lo a; Aston Villa, Leeds United leh Arsenal laka an goal chhuah belhkhawm chu goal 12 zet a ni.
Baggies hian match 19 aṭangin point 11 chiah an hmu a, 19-naah an awm mek. Amaherawhchu Big Sam-a'n Premier League-ah a team enkawl a la relegate pui lo a, Man City lakah pawh defensive game nen point hlawhchhuah an tum ang.