Fury career ka tun dinsak - Wilder

Boxer rothap pahnih Deontay Wilder leh Tyson Fury te inhnek hun a hnai zel a, nimina an news conference neih hnuhnung berah Wilder chuan, "Fury-a career uai thla mek chu ka siam ṭhatsak leh a ni," tiin a sawi!

MGM Grand Garden Arena, Las Vegas-a inhnek tur hian mipui ngaihven a hlawh a, boxer pahnih an invau tawn reng avangin inhnek hmuhnawm tak hmuh a beisei ngam. 

Wilder chuan, "I uaithla lam tawh chu kei hian ka tung ding leh che a, i dawhkanah chaw ei tur ka chhawpsak che a ni. Tunah a vawi hnih nan ka ti leh dawn ta a, ka ṭhatna hi theihnghilh suh," a ti a, an inhnek avanga Fury chu lar thar leh vel mai maiah a ngai!

December 2018 khan boxer pahnih hi an lo intawng tawh a, sawisel hlawh takin inhnehtawkah puan an ni. Fury hian thla 40 vel chu boxing a hawisan a, rilru lam buaina neiin zu leh damdawi lamah a talbuai hle - a lo kir leh aṭanga thla rukna vel lekah Wilder hi a hmachhawn. 

Fury chuan, "Min chawikang leh ang maia a ṭawng vel hi chu thil lawi lo mai mai a ni. A damchhunga a sum thawhchhuah tam ber petu chu kei hi ka ni a, hei hi lawmthu min hrilh dan chu a ni. 

"Hlauhna avanga a thin phu dup dup saw ka hmu a, a hlauthawng takzet - ka la knockout dawn a ni," a ti a, result sawisel hlawh tak a awm tawh loh nan Wilder hi tukdawl ngei a tum. 

Boxer pahnih hi February 22 hian an inhnek dawn a, keini lamah chuan February 23, Pathianni zing dar 7:30 chu an inhnek hun tur a ni. 

MGM Grand Garden Arena-a inhnek tur hi India ramah chuan official-a TV-a pe chhuak tur leh free live streaming site a awm hran lo - ESPN+ leh Fox Sports apps-ah te a en theih thung ang.