Barca an chak; Atletico an kal zel

Spanish La Liga lam pawh a ngaihnawm chhunzawm zel a, Barcelona chuan nomawi beiseina an la nei ve reng tih pholang turin Elche chu 2-0 in an hneh. 

Barca tan Frenkie de Jong chuan goal hmahruai a khung a, Riqui Puig chuan minute 89-naah Barca senior team tana a goal hmasa ber a khung ve bawk. 

Pathianni zan La Liga inkhel dangah Atletico Madrid chuan 3-1 in Valencia an hneh bawk a, Valencia tan Uros Racic chuan goal hmahruai khung mah se Atletico hian Joao Felix, Luis Suarez leh Angel Correa hmangin an chhanglet. 

Atletico Madrid-in hnehna an chan avangin La Liga table chung berah an dinhmun an sawhngheh chhunzawm zel a, anmahni hnaih bertu Real Madrid aiin point sarihin an sang fal mek - match khatin an khel tlem zawk bawk. 

Barcelona-in hrem vangin an thiampuipa Lionel Messi an chhawr thei lo a, Argentine forward hian Spanish Super Cup final-a Athletic Bilbao an ngam loh ṭumin red card a hmu. 

Messi hi match hnih chhung inkhel thei lo tura hrem a ni a, Barcelona chuan hremna hi an khinglet . Mahse, Catalan club beisei angin khinletna hi pawmsak a ni lo a, Messi tel loa

tualchhung inelna match hnih an khelh a ṭul phah. 

Barca hian kar hmasa khan Copa del Rey round of 32-ah Spanish third division club UE Cornellà chu Messi tel lo hian an hmachhawn tawh a, penalty vawi hnih ngawt an hmu chungin Miralem Pjanic leh Ousmane Dembele-ten an khung thei lo ve ve. 

Catalan club hian extra time-a Dembele leh Martin Braithwaite goal hmangin hnehna an chang hram a, third division club laka an hun khawhral zozai dan ngaihtuahin Messi tel loa Elche an hmachhawn tur hi an ngaihtuahawm hle. 

Barca fan-ten hlauhthawnna nen an team inkhel an thlir a, mahse, an hlauhthawn zualpui ti reh turin Frenkie de Jong chuan minute 39-naah goal hmahruai a rawn khung. 

Elche defender Diego Gonzalez chuan cross ball aṭanga ball kal chu an lamah a dang per a, Dutch midfielder De Jong hian pet hman lo pawh ni se, a goal tho ang. 

Barca fan-ten an goal hnihna hmu tur erawhin an nghah rei a ngai - minute 89-naah rawlthar duhawm Puig chuan De Jong hnen aṭanga a ball hmuh chu an goal hnihna ni turin a tauh lut a, chak tur a chiang tawh. 

Kum 21 mi Puig hi Barcelona academy chhuak a ni a, Spanish midfielder tan senior team tana match 25-a khelha goal a khung vawi khatna a ni. 

Barcelona-in inkhel an thunun tluan chhuak zak a, minute 90 chhunga 65% ball changin vawi 15 ngawt shot an nei a, an shot neih zinga pariat chu goal zawnah a kal. 

Elche goalkeeper Edgar Badia chet ṭhat zan ni lo se Barca hi goal tam zawk khung thei an ni a, kum 28 mi Spanish keeper hian Ousmane Dembele goal khung tur ṭha taka a dan bakah Trincao-a hun ṭha neih vawi hnih chu ṭha zetin a dang bawk. 

Match 19 chhung chak zo tawh lo Elche hian point hlawhchhuah theihna remchang erawh an nei a, Argentine winger Emiliano Rigoni chuan Barca keeper Marc-André ter Stegen chiah a hmachhawn chungin goal-a khung thei lo. 

Barca tana goal leh assist neitu De Jong chuan, "Kuminah kan insiam ṭha a, kan match zawng zawng khualmuala khelh a la ngai vek chungin La Liga-ah kan la tlawm lo a ni," tiin champion beiseina an la neih thu a sawi. 

Barcelona boss Ronald Koeman-a'n Catalan club a enkawl dawn tih a chiana a mamawh loh thu a hrilh Luis Suarez-a'n Dutch coach-in thutlukna a siamsual tih pholangin goal a khung chhunzawm zel a, 3-1 in Valencia lakah a team a chakpui. 

Valencia tan Racic chuan minute 11-na lekah goal hmahruai rawn khung mah se Atletico hian first half-ah Felix hmangin an chhanglet nghal a, second half-ah Suarez leh Correa-ten an khung ve leh bawk - Suarez-a goal hi Felix-a siamsak a ni.

Kum 34 mi ni ve tawh Suarez hian tun season-ah league match 15 khelin goal 12-a khung tawh a, assist vawi hnih a nei bawk - Sevilla striker Youssef En-Nesyri nen goal 12 ve ve khung tawhin La Liga top scorer an ni mek a, amah duh lotu Barca player zingah league-a a goal khung ang zat khung thei an awm rih lo. 

Tlarhmaa Suarez kawppui Felix pawhin a man phu angin a khel chhuak ṭan a, kum 21 mi forward hian tun season-ah league match 17 khelin goal ruk a khung a, assist vawi nga a nei ta bawk - a kum zat nena enkawpin a nep lo tih a lang.