St Mary's Stadium-ah Arsenal lenglut leh dawn

Arsenal-in kartawp FA Cup inkhelah Southampton an hneh lo a, zanin dar 1:45 hian an chak lohna hmun St Mary's Stadium-ah bawk Gunners-in Saints an hmachhawn ang. Tun ṭuma an inkhelhna tur erawh Premier League a ni tawh dawn a, FA Cup aiin an pawimawh zawk.

Mikael Arteta-a'n FA Cup-ah Newcastle 3-0 a an sawp ṭum aṭangin player pasarih ngawt a thlak. An striker chhuanvawr Pierre-Emerick Aubameyangleh Emile Smith Rowe te squad-ah an awm lo a,  Gabon striker hi mimal thil vanga squad-a awm lo a ni. Bench-ah hian player ṭha dang Bukayo Saka, Alexandre Lacazette leh Thomas Partey te an awm bawk.

Zaninah erawh Arteta hian a player neih ṭhat a rawn hman ngei a rinawm a, Premier League match hnuhnung pangaah chak loh an nei lo a, vawi li ngawt an chak tih hriat a ṭha. Tun hnaia an chet ṭhat avangin season thara Europa League khelh beiseina a nung thar a, an chung chiaha awm Southampton laka point thum hmuh hi an hna hmasa tur a ni.

Arsenal tan chanchin ngaihnawm hriat tur a awm chho zel a, Real Madrid aṭangin loan hmangin talent nei ṭha bik Martin Odegaard an lalut hnai. Gunners hian Norwegian midfielder ṭha lalut tur hian Spanish club hnenah pound maktaduai 2.5 an pe ang a, a hlawh tur an tumsak bawk ang.

Kum 22 mi Odegaard hi tun season-ah Real Madrid tan vawi kua a inlan tawh a, goal a la khung lo. Amaherawhchu Odegaard hi a theihna anga a khel chhuak a nih chuan hmun sang zawka Gunners dah thei tur a ni a, Arsenal ṭantute chauh ni loin English football en ṭhinte tan chanchin lawmawm a ni.