Kolkata khawpuiah India an mualpho

Asian champion Qatar nen an inhnehtawk avanga fakna chi per pawh a la hul hmain India an mualpho zui a, an mikhual Bangladesh nen 1-1 in an inhnehtawk. 

Thawhlehni zan khan India chuan World Cup qualifier khelin Bangladesh an mikhual a, si an phurh hmasak zet hnuah hun tawp dawna Adil Khan goal khung hmangin si phurh an sut hram. Sunil Chhetri hoa khel India-in chhuanlam tur an nei lo a, "An khel chhe takzet," tih chu India chak loh chhana ṭawngkam hman theih hnaivai ber a ni. 

Blue Tigers hian match thum aṭangin point thum chiah an nei ta a, World Cup qualifier third round luh beiseina a tlem ta hle. 

'Milian mutthlu' tih hialin FIFA meuhin India chungchang sawi ṭhin mah se Blue Tigers hi muhil kaihthawh har pawl tak an niin a lang ta. Igor Stimac-a'n 4-4-2 formation hmangin tlarhmaah Chhetri leh Manvir Singh a inkawptir a, mual sirah Ashique Kuruniyan leh Udanta Singh an awm. 

Tlarhmaah bul ṭan tur meuh chuan Manvir Singh a la puitling tawk lo tih a lang a, Kuruniyan lah Indian media ten an sawi vul ang a ni lo tih a lang zel. Midfield laiah Sahal Abdul Samad leh Anirudh Thapa ten ball an sem hleithei lo a, tlarhnungah lah Sandesh Jhingan awm loh chu hmuh theih khawpin a langsar. 

India-in awmze nei loin long ball an inpe nasa a, chuti chung chuan Blue Tigers hi first half-a chance ngah zawk an la ni tho - a pawimawh zawk goal erawh an khung lo. Bangladesh hian 4-1-4-1 formation rawn hmangin tlarhnung venhim hmasak chu thupuiah an nei a, counter attack-ah Indian fan-te thin an ti phu leh ṭhin. 

Minute 42-naah India goalkeeper chhuanvawr Gurpreet Singh Sandhu a chesual ta nge nge a, Jamal Bhuyan freekick aṭanga ball kal chu Punjab keeper hian a man ṭhelh a, Saad Uddin chuan goal-ah chantirin a lo tauh lut!

Hun tawp nan minute hnih chiah a awm tawh tihah India hian an si phurh an sut a, Adil Khan chuan a khung - a tawnhriat neih tlemna a lang zui a, hun tlem tawh kara chak mamawh laiin a goal khung a lawm chiam!

Jhingan inhliam vangin international football-a chawlhsan hnua lo kir leh Anas Edathodika chu luhtir a ni a, kum 32 mi defender hian match fitness a tlachham tih a lang a, tlarhnung an inringtawk lo bawk. 

Mual sir lama tlarhnung vengtu Rahul Bheke leh Mandar Rao Desai tan an khelh dan chu insawi theih nana hman chi a ni lo tih a lang a, an khel chhe takzet. Bangladesh-in goal an khung belh leh ṭep zawk - Newaj Jibon chuan Gurpreet chauh a hmachhawn chungin goal a khung thei lo a, Mohammad Ibrahim chuan bar a tih per bawk.

Lallianzuala Chhangte chu minute 72-naah luhtir a ni a, India tana lang chiang ta ber chu goal khung turin tlarhmaah Jeje Lalpekhlua an mamawh tih hi a ni.