Fury a hausak belh dawn

British boxer rothap Tyson Fury chuan WWE-a a match hmasa berah a hlawh hnem dawn a, khawthlang media ten an tarlan dan chuan Braun Strowman nena an inhmachhawn turah pound maktaduai 12 vel a hlawh dawn. 

Fury leh Braun Strowman hi October 31 khian Saudi Arabia-ah an inhmachhawn dawn a, kum 31 mi boxer chet vel dan tur hi infiamna khawvelin a nghakhlel tawh hle. Hetihlai  hian Fury promoter Frank Warren chuan a boxer hian WWE-a a inhnamhnawih tur chungchang a hrilh lo niin a sawi a, a lungawi lo. 

Warren chuan, "Eng nge sawi theih ka neih? WWE en turin a va kal a, insual turin thutlukna ava siam ringawt! Chawl hahdam rih tur a ni a, mahse heti zawng hian thutlukna a siam si. "Fury hian he fight a hmachhawn tur hi min hrilh lawk lo a, a hnuah kan sawi dun chauh. A thutluknaah hian lawm angin awm dawn ila, dawt sawi ka ni ang. Mahse, thutlukna a siam tawh miau si," tiin a sawi.