Bayern keeper Neuer-a'n record siam

Bundesliga-ah Bayern Munich-in pakhatna dinhmun sawhnghetin Pathianni zan khan Schalke 4-0 in an sawp. Inkhel dangah Hoffenheim-in FC Cologne 3-0 in an sawp bawk. Bayern keeper Manuel Neuer chuan Bundesliga-ah clean sheet vawi 197 a siam a, Germany leh Bayern legend Oliver Kahn-a record a khum.

Bavarians tan Thomas Muller-a'n goal hnih a khung bakah Robert Lewandowski leh David Alaba ten goal khat ve ve an khung. Polish striker Lewy hian league match hnuhnung pariatah goal a khung vek.

Inrinni zanah Bayern elpui RB Leipzig, Bayer Leverkusen leh Borussia Dortmund an chak loh vek avangin Bundesliga champion lai hi point sarihin an sang fal tawh.

Bayern boss Hansi Flick chuan, "Goal li kan khung a, goal kan chhuah lo. Chuti chung chuan kan lawm lo. Insiamṭhatna tur ka nei a, tun aiin ball kan chan tam a ngai. A changin kan khel chak lutuk a, a changin kan muang hret a, a chang leh risk kan lak nasat avangin ball kan hloh leh ṭhin," tiin a sawi.