Juve-in Milan an hnaih

Milan team pahnih - AC Milan leh Inter Milan point hloh karah Juventus chuan hnehna an chang a, an mikhual Bologna 2-0 a hnehin Serie A nomawi an kawl lai chu team dang laka chan mai an tum bik lo.

Pathianni zan Allianz Stadium a inkhelah Old Lady tan Brazil midfielder Arthur-a'n minute 15-naah Italian club tana a goal hmasa ber a khung a, inkhel chawhnu lamah Weston McKennie-a'n goal hnihna a tauh lut bawk.

Kar tawp inkhel dangah hmahruaitu Milan chu Atalanta lakah an tlawm a, pahnihna Inter pawh Udinese nen an inhnehtawk. Andrea Pirlo naute erawhin point thum an hmu - hmahruaitu an phak lohna chu point sarih a ni, match khatin an khel tlem.

Juventus manager Pirlo chuan, "Kan khingpuite khan na takin min nawr reng a, chumi karah hun ṭha kan insiam thei ṭhin kha a lawmawm hle," a ti. Italian manager hian thlasik bazar chhungin striker lei an tum loh thu a sawi bawk.