Rodrigo goal hmangin Spain tling

Friends Arena, Solna-ah mikhual Spain tan Rodrigo Moreno chuan injury time-ah goal a khung a, Sweden nen 1-1 in an inhnehtawk.

Thawhlehni zan inkhel result avangin Euro 2008 leh 2012 champion La Roja hi Euro C'ship 2020 khel turin an tling. Group F aṭanga hmunruak pakhat hi Sweden leh Romania ten an inchuh ang.

Sweden-in bul an ṭan ṭha a, point khat chauh mamawh Spain tan hna a harsa dawn tih a lang. Spain keeper David de Gea chuan Robin Quaison ball tauh chu ṭha zetin a dang. 

Manchester United keeper De Gea hian minute 50-naah Marcus Berg leh Emil Forsberg te goal khung tur dang zawn zat mah se a per leh chu Berg-a'n a khung ta tho. Kum 28 mi De Gea hi malpui hliam vangin lakchhuah ni a, Robert Moreno hote chak lo thei dinhmunah an ding.

Spain-in chak duhin Rodrigo an luhtir a, Valencia striker hi danglamna thlentu a ni. La Roja hian minute 90 chhungin goal an la khung thei lo.

Injury time-ah ram tana vawi hnih inlanna chauh Napoli midfielder Fabian Ruiz ball pek chu Rodrigo-a'n siphurh sut nan a hmang. Goal dang luh belhna hun a awm tawh lo a, Spain-in an nawr nat miau avangin Sweden an ṭang tluan thei lo.

Group F inkhel dangah Romania chu an mikhual Norway lakah an ṭangtluan thei bik lo. Alexandru Mitrita hmangin Romania-in minute 62-naah hma an hruai a, Norway-in Alexander Sorloth hmangin injury time-ah an sut.

Norway-in point 11 hmuin beisei tlem an nei a, sawi zui hlawh erawh Romania leh Sweden a ni. Ram pahnih hi November 15 zanah Bucharest-ah an inkhel dawn a, Sweden tan mikhualna rama point hlawhchhuah hrim hrim a hlu ang.

Spain erawhin hahdam takin match hmabak pahnih an khel thei dawn. Coach Robert Moreno chuan, "Football hi chu a mak khawp mai. Draw vanga kan lungawi loh hnu lawkah draw vangin kan lawm. Kan khelh danah ka lawm a, ka player neih danah ka lawm bawk," tiin a sawi.