Bulgarian football hotu a bang

England nen an inkhelh ṭuma Bulgaria fan-te chet dan avangin Bulgaria Football Union president Borislav Mihaylov chu a hna aṭangin a bang a, BFU chuan, "Tun hnai thil thleng avangin a bang a ni," an ti. 

Thawhṭanni zan khan England hian khualmualah Bulgaria chu 6-0 zetin an sawp a, fan-ten vunrawng inhmuhsitna an lantir nasat avangin vawi hnih lai inkhel chawlh a ngai hial. Bulgaria prime minister Boyko Borissov chuan Thawhlehni khan Bulgaria football hotupa hi bang turin a lo ti tawh a, mawhphurhna lain banna a thehlut ta a ni.

Reading goalkeeper hlui Mihaylov hian player a nih laiin ram tan World Cup vawi thum a khel a, kum 2011 aṭang khan UEFA executive committee-ah member a ni tawh bawk. Europe-a football thuneitu sang ber UEFA chuan Bulgaria hi thubuai an siamsak nghal a, an thubuai zingah vunrawng inthliarna, hnam hla sak lai tihbuai leh fan-ten thil an vawm chu hremna pek nat theihna tur niin a lang. 

England an fihlim bik lo a, hnam hla tihbuai leh team puibawm tur hnathawk hruai tam tawk loh avangin thubuai siamsak ve tho an ni. Thubuai ngaihtuah hun tur erawh UEFA hian a la puang lo. UEFA president Aleksander Ceferin chuan, "Chi inthliarna lantir ṭhintute hrem turin kan inthurual a ngai a ni," tiin a sawi.