Murray a inhnukdawk

Andy Murray chuan Australian Open 2021 a khelh loh tur thu a ti chiang ta. Britain star hian coronavirus a kai a, khunghran a ngaih avangin a duh angin training a nei thei lo a ni.

Kum 33 mi Murray hian natna langchhuak a nei hran lo. Mahse hri a kai avangin an ramah enkawl a ni - inelna neihna tur Melboure khawpuiah a duh leh tum anga hmain a zin lut ve thei ta lo, major tournament khel tur chuan Wimbledon nghah a ngai dawn.

Grand Slam vawi thum champion tawh Murray chuan, "Tennis Australia nen kan inbe reng a, Australia ka thlen huna khunghran hun chhung tur leh hmalak dan tur hrang hrang kan sawi, mahse tum angin ka awm theih dawn ta lo.

"Australian Open ka khel thei lo tur hi a pawi ka ti a, chutih rualin inelna ka hmachhawn theih dan tur zawnga hmalatu zawng zawnte chungah lawmthu ka sawi takzet zet a ni," tiin a sawi.

Hliam vangin Murray hi a buai fo a, tun dinhmunah world number 123 a ni. Australian Open atan hian duhsak takin wildcard pek a ni a, mahse an duhsakna pawh hi hrileng vangin a ti hlawhtling thei dawn ta lo.

Tennis season khat chhunga Grand Slam hmasa ber Australian Open hi February 8 aṭangin Melbourne Park-ah khelh a ni ang.