Sanchez zai a ngai mai thei

Alexis Sanchez hliam endik a ni a, Chile international kerek hliam hi zai a ngai mai thei niin a khelh mekna club Inter Milan chuan an sawi - zai a nih chuan a chawlh a ngai rei ang.

Manchester United aṭanga loan hmanga Inter zawmtu Sanchez hi Chile leh Colombia inkhelh ṭumin hun tawp dawnah thlak a ngai. Inkhelh banah Chile coach Reinaldo Ruedo chuan an zai a nih chuan thla thum vel a chawlh a ngaih a rin thu a lo sawi tawh.

Inter Milan chuan thuchhuah siamin, "Alexis Sanchez chu a ke rek veilam a hliam na angreng a, a lan dan chuan zai a ngaih hmel," an ti. Nizan khan Professor Ramon Cugat kaihhruaina hnuaiah Barcelona-ah a hliam hi ennawn niin a dinhmun chiang taka tarlan hman a ni lo.

United lama beisei phak lo Sanchez hian Antonio Conte kaihhruaina hnuaiah beiseina a nei thar leh mek a, Italian Serie A match thum khelhah goal khat khungin vawi khat chu hnawhchhuah a ni tawh thung. Conte-a enkawl Inter-in season bul an ṭan fuh hle a, league-ah chuan an match hnuhnung bera Juventus an ngam loh hma kha chuan an chak vek. Pathianni zan hian Sassuolo an lenchilh dawn a ni.