Liverpool harh tur beng daitu United

Old Trafford-ah Liverpool-in Mohamed Salah hmangin harhtharna an chang dawn emaw an ti hman a, an tana a hnaih ber lai erawh 'emaw' an tih lai chu a ni. 

FA Cup fourth round inkhelah Manchester United chuan 3-2 in an mikhual Liverpool an hneh a, Salah chuan goal hnih khung mah se United-in Mason Greenwood, Marcus Rashford leh Bruno Fernandes hmanga goal an khung avangin hnehna an chang - Liverpool-in FA Cup an mangṭha a ṭul ta. 

Kum 2021-ah Liverpool-in inelna hrang hrangah match nga an khel tawh a, vawi khat chiah an la chak - an hneh awmchhun hi Aston Villa academy player-te an ni a, inchhuanna tur a ni lo. 

Liverpool tan Mohamed Salah-a'n a match hnuhnung pahnihah goal a khung lo a, sawisel a tawk nasa hle. Old Trafford-ah erawh Egyptian forward hian a zia a chhuah nghal a, minute 18-naah goal hmahruai a khung. 

Liverpool fans an thaw huai a, an hlim chhung erawh a rei lo - Greenwood chuan Rashford-a ball pet ṭha tak aṭanga a ball hmuh chu finishing tawih tak hmangin goal-ah a chantir a, si phurh a sut. 

Second half ṭan aṭanga minute thumna lekah United-in Rashford hmangin goal an khung zui leh a, chak tura ngaih an ni tawh. Mahse, Liverpool-in awlsam taka tlawm an tum bik lo a, Salah bawkin Reds tan a chhanglet. 

United boss Ole Gunnar Solskjaer-a'n inkhel thlak danglam tur player a mamawh tih a inhria a, minute 66-naah Bruno Fernandes a luhtir. 

Portuguese midfielder hi club lian lakah beisei a phak loh ṭhin avangin sawisel a tawk nasa a, Old Trafford-ah amah sawisel ṭhintute a ngawihtir - minute 78-naah freekick mawi bik hmangin goal a khung a, Alisson-a tan meuh pawh dan chi a ni lo. 

Fernandes-a goal khung hma hian Reds-in Trent Alexander-Arnold leh Salah hmangin hmahruaina remchang an nei a, mahse, David de Gea aia luhtir keeper Dean Henderson an paltlang zawh loh avangin hnawhchhuahin an awm. 

Liverpool-in inelna hrang hranga an match hnuhnung pasarihah vawi khat chiah hnehna an chang a, mahse, Liverpool manager Jurgen Klopp chuan an tan lungngaihna tur a awm loh thu a sawi. 

Klopp chuan, "Kawng dik lam pana kan thil ṭha tih tam tak ka hmu a, ka lawm a ni. Kan beisei ang result a nih loh avangin ka lawm lo ngei a, kan ṭhat dan berin kan khel chhuak lo. 

"Mahse, kawng dik lam panin kan pen mek a, min lo ngaihtuah suh u. Kan inlungrual em em a ni," tiin an thawh leh ngei tur thu a sawi - Reds hian Ningani zanah league match khel turin Tottenham Hotspur an lenchilh zui ang.