MPL awm tawha team la intluk tawk ber ṭum

Mizoram Premier League hi season riatna a ni tawh a, team ṭha fal an awm ṭhin. Club tin tan hun ruat a awm tih theih turin Chanmari FC hun, Aizawl FC hun leh Chhinga Veng hun te a awm. Tun ṭumah erawh match nga ṭheuh an khel tawh chungin eng team hun ruat nge tih hriat a la har takzet.

MPL hi Lunglei, Champhai leh Serchhip-ah te khelh a ni tawh a, round 7-na khelh a nih ṭhin avangin semifinal lut tur awm ang ruangam a awm tawh ṭhin.

Tun ṭumah erawh Ramhlun North leh Chawnpui FC te che chhe deuh mah se pakhatna leh parukna FC Venghnuai inthlauhna chu point thum chauh a ni. Hei chauh hi ni loin table chunglama awm pathum Chhinga Veng, Mizoram Police FC leh Aizawl FC ten point kua vek an hmu.

Round 6-a inkhel hmuhnawm ber tura ngaih Chhinga Veng leh Mizoram Police chu a tawp kharna tur a ni dawn. Mak ang reng tak chu fixtures hi siamrem ni loin a tir aṭanga awm sa a ni.

Team ṭha ber zinga mi Aizawl FC midfield mawitu Paul Ramfangzauva hi Kolasib tlangval a ni a, an khuaah an inkhelh dawn avangin ṭantu pawh a ngah ang. AFC-ah hian Kolasib rawlthar Melory Lalrinsanga a awm bawk.

FC Venghnuai innghahna Isak Vanlalpeka hi Diakkawn tlangval a ni a, Aizawl FC nen an inkhelh dawn avangin Kolasib mipui chu hmun hnihah an inṭhen ang. Chanmari FC-in season ṭan hmain S. Malsawmtluanga hoin Kolasib an tlawh tawh a, tun ṭumah hian Mama awm tawh lo mah se Flavius Lalruatkima an kawl. Project Veng FC nen an inkhelh ṭumin Flavius hian captain armband a hreng a, tun ṭumah hian khelhna hmun a chang ang em tih erawh zawhna 

a awm thung.

Electric Vengin defender huaisen Rengtekawn tlangval C. Lalnunmawia an kawl a, khelmuala theihna zawng zawng chhuah ṭhin Mawitea hian ṭan a hlawh viau a rinawm.

MPL8-ah goal 55 a lut tawh a, goal khung tam ber Chhinga Veng forward MC Malsawmzuala hian goal nga a khung tawh. Siaha tlangval MC-a hian bench aṭangin bul a ṭan ṭhin a, goal hnih khung tawh foreign striker Quattara Sie hi en hlawh zinga mi a ni ang.

MPL-ah hian own goal pathum a awm tawh a, hemi tiam lo hian player 40-in goal an khung tawh. Round hnuhnung pahnihah player hran ṭhiauin goal an khung a, goal khat aia tam khung thei player pakua chiah an la awm.

Chutihrualin Kolasib-ah goal kan hmu ngei dawn a, khelmual la thar ṭha tak hian goal tam zawk a thlen phah ngei ang. MPL8-ah tawnhriat nei player leh rawlthar beiseiawm an inchawlh pawlh nasa a, player ṭha leh nakin lawka star la ni tur hmuh duh chuan hmaih phal chi a ni lo ang.