Champions League khel tur FC Goa

Nilaini zan khan FC Goa chuan Indian Super League inkhelah 5-0 in Jamshedpur FC an sawp a, table chung ber luahin League Winners Shield an dawng. 

FC Goa hi Indian club zinga AFC Champions League khel thei hmasa ber an ni dawn bawk a, Goan club hian Asian football-a club inelna sang ber hi season tharah group stage aṭangin an khel ang. 

Gaurs (FC Goa sawina) hian league match 18-ah point 39 an nei a, match khat khelh tur la nei chunga point 33 neitu ATK tan umphak theih an ni tawh lo. 

FC Goa-in Jamshedpur lakah zahngaihna an lantir lo. Minute 11-naah goal khung khawl Ferran Corominas hmangin an khung ṭan - Coro hian tun season-ah league match 15 khelin goal 14 a khung a, assist vawi li a nei!

Minute 11-na lekah goal a lut ṭan chungin goal dang erawh second half-a lut vek a ni. Hugo Boumous chuan goal hnih a khung a, Jackichand Singh leh Mourtada Fall ten goal khat ve ve an khung bawk. 

Kum 24 mi Boumous pawh hi Goa-in table chung bera league season an khar nan a thawh hlawk hle - match 14-a khelhah goal 11 a khung a, assist vawi 10 ngawt a nei thei!

Tun hmain AFC Champions League lama hmun ruak chu I League champion tan dah a ni ṭhin a, mahse preliminary round aṭanga khelh ṭan a ngai ṭhin. Indian club zingah group stage khel thei an la awm ngai lo. 

Mahse, season thar aṭangin group stage-a team 32 ni ṭhin chu 40-ah tihsan a ni dawn a, hei vang hian Indian club tan pawh qualifier khelh kher ngai loa khelh theih a ni ve dawn ta. 

Mahse, AFC danah Champions League khel tur chu league-a sang ber nih a ṭul - ISL-ah final hmanga champion zawn ṭhin a ni si a, league round-a point hmu sang ber chu Champions League khel tura tih an ni ta a ni. 

FC Goa hian rin loh takin coach Segio Lobera chu February 1 khan a hna aṭangin an chawlhtir a, Spanish coach an ban hnua match thum an khelhah an chak vek. 

Hetih chhung hian Goan club hian goal 14 ngawt an khung a, goal thum chiah an chhuah thung - manager lailawk Clifford Miranda chuan fak a hlawh phah hle. 

Mahse, India international hlui chuan, "Kan vai thawhrim rah a ni a, Sergio Lobera leh Derrick Pereira (technical director) te pawh fak phu an ni. A pawimawh berah chuan players leh fan-te an ni," tiin midang a fak. 

ISL chuan Nilaini khan League Winners Shield awm tur thu an puang a, hei hi league round-a ti ṭha berin an dawn tur a ni - pawisa fai nuai 50 a keng tel bawk. 

Season dangah League Winners Shield a la awm ngai lo a, mahse tun season-ah league round-a ti ṭha berin Champions League an khelh dawn takah chuan Shield dawn tur siamsak an ni ta a ni. 

FC Goa hi sum tam zawkin a hmuak - playoff khel tura an tlin chian avangin nuai 50 bakah hian a tlem berah vaibelchhe 1.5 chu an dawng dawn hrim hrim a, vaibelchhe hnih chu an dawng dawn chiang tihna a ni nghal. 

ISL-a champion team-in an dawn tur hi vaibelchhe riat a ni a, final-a chak lo zawk dawn tur erawh vaibelchhe li a ni - a zahve laiin a inthlau. Semifinal-a chak lo zawk team pahnihin vaibelchhe 1.5 ve ve an dawng ang. 

Khelmual nei ṭha ber ‘Best Pitch Award’ sem a ni dawn a, hei hian sum faiin nuai 10 a keng tel. Mimal chawimawina dawngtu top scorer leh best goalkeeper ten nuai thum ve ve an dawng ang a, ‘Hero of the League Award’ dawngtu tan nuai nga dah a ni bawk. 

Emerging Player of the League chuan nuai 2.5 a dawng dawn a, assist ngah ber thlanna ‘Winning Pass of the League’ dawngtuin nuai khat a dawng tel ang a,  Fittest Player of the League chuan nuai 2.5 a dawng ang. 

Zanin dar 7:30-ah Chennaiyin FC chuan Mumbai City an lenchilh dawn a, club pahnih hian a sang pali zinga tel beiseina an la neih ve ve avangin inkhel hmuhnawm bik a beisei ngam. 

Jerry Lalrinzuala, Laldinliana Renthlei leh Lallianzuala Chhangte ten hmun pawimawh an channa Chennai club hian hnehna an chan chuan playoff an khel dawn chiang ang. 

Mumbai hian match khata an khelh tam zawk avangin Chennaiyin hian draw result pawh hlawh chhuak se beiseina an la nei thei dawn a, a tawi zawnga sawi chuan Mumbai club aiin an dinhmun a ṭha zawk.