Kolasibah MPL khelh a ni dawn ta

Kolasib-a Mizoram Premier League match hmasa ber chu vawiin chawhma dar 11:00 hian Mizorama I League club awm chhun Aizawl FC leh MPL club thar FC Venghnuai ten an khel dawn. 

Kumin I Day Football semifinal-ah FC Venghnuai hian AFC hi an hneh a, chak tur chiang a awm loh zia chu a hriat nghal. Team pahnih hi table-a an inthlauhna chu point thum chauh a ni a, MPL inkhel pawimawh tiha sawi theih a ni.

Aizawl FC coach Standly Rozario chuan, "Football-ah chuan eng pawh a thleng thei. I Day Football-a FC Venghnuai kan hneh loh dan erawh kan vanduai hlein ka hria. Inkhel kan thunun vek a, ruahsur vangin inkhelh chawlh chang a awm a, a tawpah penalty hmangin an vannei," tiin an inkhelh tawhna a thlir kir.

I League club hian MPL-ah penalty pet goal an harsat chhunzawm a, Chanmari FC nen goal awm loa an inhnehtawk ṭumin defender rinrawl Richard Kassaga-a'n a hlah. Match hnuhnung bera Chawnpui FC an hneh ṭumin Lengpui forward ṭha F. Lalremsanga'n a hlah leh bawk.

Mohun Bagan leh Shillong Lajong coach hlui Rosario chuan, "Penalty hi kan hmu leh a nih pawhin a pettu tur hi ka sawi a rem lo. Keeper AwP-a pawhin a pet daih thei a sin. Ka sawi theih chin chu training-naah chuan kan zir uluk sawt e," tiin penalty an fimkhur tur thu a sawi.

Kolasib mipui vanneihna tak tur chu team pahnihin attacking football khelh an tum hi a ni a, team nem zawka ngaih FC Venghnuai tawm bik an tum lo. Coach Rindika Hmar chuan, "Kan intum hmasak khan risk lain defensive game kan khel a, tunah pawh risk la thoin attacking game kan khel dawn. Aizawl FC hi kan hneh thei tih kan hria a, a chhe berah draw kan duh," tiin Vanglaini a hrilh.

FC Venghnuai hian result hnuhnung pahnihah an veng mipui lawmna an thlen lo, Chawnpui FC nen an inhnehtawk hnuah Chanmari FC an hneh lo. MPL club thar hian an player pawimawhte an chhawr thei vek dawn a, top scorer ni tawh Laldampuia'n bul a ṭan thei lo a nih pawhin Kolasib khelmualah hian a inlan hrim hrim a rinawm.

Aizawl FC coach Standly chuan, "Match zawng zawng hi a pawimawh. FC Venghnuai nen hian chak ngei kan duh," tiin Vanglaini a hrilh. I League club hian foreigner pahnih best player ni lai Alfred Kemah Jaryan leh defender Richard Kassaga te an kawl a, an ṭangkai ve ve a, an khel ve ve ngei ang. 

Midfield-ah Kolasib tlangval ball sem thiam Paul Ramfangzauva an kawl a, 'home ground' ah a khel dawn. Goal nawr turin Remsanga, Rochharzela leh Isak Vanlalruatfela te an nei bawk.

Chanmari FC-in FC Venghnuai an hneh zawhah coach S. Malsawmtluanga'n banna a thehlut a, club-in an pawmpui tak siah chuan coach nghet nei loin Kolasibah an zin dawn. Vawiin tlai dar 2:00 hian Chanmari FC-in an coach hlui HC Zarzoliana kaihhruai Chawnpui FC an hmachhawn ang.

Chanmari FC-in Mama thlakna la hmu lo mah se coach lailawk atan Samuel Lalrinzuala Sailo an la a, ani hi CYMA Football hnuhnung bera an Branch YMA team champion puitu a nih avangin dah hniam theih a ni lo. Samuel-a thlawp tur hian Chanmari FC coaching staff zinga tel reng ṭhin goalkeeper hlui Lalthlamuana a awm a, team manager Lalhmangaiha Sailo te nen an thawk ho nghal ang.

Hetihlai hian Chawnpui FC coach Zara chuan, "Mama nen hian kan la inbe lo a, a ban thu hian min ṭhawng hle. Chanmari FC player zingah Mama chawlh vanga rilru taka lawm lo an awm ang a, khelh tam tawk loh vanga lawm an awm thei bawk. Hei vang tak hian tun hi Chanmari phur vanglai ni loin hneh theihna chance ṭha a ni," tiin remchang an zawng tur thu Vanglaini a hrilh. 

Chanmari FC hian MPL ṭan hmain Kolasib an tlawh a, an team-ah player langsar keeper Zothanmawia, defender Lalrinchhana Tochhawng, MS Dawngliana, David Lalrinmuana, Lalnunzama leh player dang ṭha an awm nual avangin ṭan pawh an hlawh ang.

Chutih rualin Chawnpui FC hi table mawngphaha an awm vanga ṭantu leh lainattu an tam a rinawm. Chawnpui coach Zara chuan, "Result ṭha neih hi a har ṭhin khawp mai. Mahse kan game hi in lo chik chuan kan khel 

ṭha telh telh a, Chanmari lakah hian beiseina sang tak kan nei. Ka naute ka ring tawk," tiin Chanmari hmachhawn tura an inpeih thu a sawi.

Kolasib-in MPL a thlen hmasak bera entu nih hi football ngainatute tan chuan inchhuanna tham a tling a, football ngaina lo tan pawh hun bika tel ve zel hi khua reia inchhir lohna a ni.

MPL club-ten inbuatsaihna an nei ṭha a, football hmuhnawm tak phochhuah tumin Kolasib an pan. An thawhrimna a hlawhtlin theih nan Kolasib mipuiin tih tur an nei a, an tih theih chu inkhel en a ni. Hei bakah hian Kolasib hi Aizawl 

aṭanga leh lan theih lek a ni a, club ṭantu ruh kawl tan chuan chhuah vahna hun ṭha ni bawk hi bawhpelh loh a ṭha hle.