Huatna, beiseina, Liverpool leh United

"English club inhal ber sawi rawh?" tiin exam zawhna siam ila, football ngaina ve dek dek tawh rilruah chuan, "Liverpool leh Manchester United," tih a lo lang nghal ang - zirtirtu tam zawk chuan mark 100-ah 100 an pe nghal ang. 

Club inhal tak pahnih hi tun season Premier League-a an dinhmun inthlau rih viau mah se an inhuatna a reh phah lo a, a zual sauh emaw tih mai tur a ni. 

Pathianni zan dar 9:00-ah Red Devils hian Old Trafford-ah Liverpool an mikhual dawn. 

'Liverpool leh Manchester United hi eng vanga club inhal tak lo ni ta nge an nih?' tih zawhna chu mi tam tak rilruah a awm ṭhin a, a chhanna hre lo an tam. 

Club pahnih inhuat ṭanna sawi dawn chuan kum 1890 lama thil thleng tawh kha keu let a ngai a, hetihlai hi England-a khawpui pahnih - in hnaih taka awm hi sumdawnnaa an ṭhan vanglai a ni. Manchester hi puanthan hmanga sumdawng an ni a, lawng chawlh hmun an neih zarzoin Liverpool an hausa thung. Manchester khaw sumdawngten lawng chawlh hmun an sual chhuak a, lawng tam zawkin Liverpool kalsanin Manchester-a chawlh an thlang zui. 

Liverpool khaw ṭhalai tam takin an hna an chân zui a, an khawpui sum lakluh a tlem phah a, Liverpool leh Manchester hi khaw inhal tak an ni zui. He inhuatna hi khelmualah an lalut a, khawvela club inhal ber pawl an nihna chu vawiin thlengin an chhawm ta reng. 

Liverpool fan-ten 'Captain Fantastic' tih ngata an koh Steven Gerrard an ngainat chhan hi khelmual chhunga a thiam chungchuan bik vang a ni satliah lo a, Liverpool khaw naupang a ni a, a naupanlai aṭang tawha Liverpool rumrût nia United huatna nghet tak a neih vang a ni tel. 

Tun hmaa United star hlui Bryan Robson kha United captain ni mah se a thiam bik em avangin Liverpool naupang Gerrard pawhin a lo ngaina hman. Ṭum khat chu kawngpuia an inkhelh ṭumin Gerrard-a ṭhianpa chuan Robson kawr hi a rawn ha a, Gerrard-a'n a ha ve chak tlat. 

Liverpool legend chuan, "United lam ka ngaihtuah lo a, Robson a nihna avang maia a kawr kha ha ka ni. Mahse, ka pain min rawn hmu a, thinrim takin min hau zui," a ti! Gerrard hian a pain a hauh dan sawiin, "Hei aia fing deuh tur hian ka lo beisei che asin. Kan ṭhenawm khawvengten engtinnge min ngaih ang?" a ti! 

Gerrard chuan, "Naupang â mai ka ni a, mahse United jersey ka hak vang khan ka pa khan min hnawtchhuak ṭep a ni," tiin a sawi. 

Liverpool ṭantute nunah United huatna a bet tel angin Liverpool an chet ṭhat apianga na ber ṭhin chu United an ni a, hei hi United legend Gary Neville pawhin a pha lo. 

Neville chuan, "Liverpool-in kumtin deuhthaw league nomawi an chawi ṭhinlaia seilian ka ni a, nâ ka ti em em ṭhin. Reds ropui vanglaia seilian ka nih avangin ka naupan lai kha seilen nana hun duhawm lo ber a ni a, hriatreng tlak a ni lo," a ti!

Liverpool leh United inkhel a nih tawh phawt chuan eng level pawh ni se team pahnihin an ngaihlu ṭhin a, chak loh zawk an duh ngai lo. A hrechiangtu zinga mi chu Neville a ni. English defender rorum chuan, "Youth team level-a kan inhmachhawn pawhin Sir Alex Ferguson khan hun âwl a neih chuan a rawn en hram ṭhin a, senior team tana ka khelh hnu pawhin buai viau mah se result zawtin ava phone hram ṭhin," tiin a sawi.