Wawrinka-a'n Lopez a hneh

European Open khelh mekah Stan Wawrinka chuan nimin khan a match hmasa ber a khel a, Swiss star hian Feliciano Lopez chu 6-7(4), 6-4, 7-6(4) in a hneh.

Thla hmasa khan Wawrinka hian US Open-ah quarterfinal a khel, a hnu lamah chuan tun inelna hi match a khelh lehna hmasa ber a ni. Darkar hnih leh minute 19 an inkhelh chhungin an khingpuiin break point vawi thum a hmuh chu a inchhanhim vek.

Grand Slam vawi thum champion tawh Wawrinka hian a match lehpekah chuan Gilles Simon a hmachhawn leh ang. Inkhel dangah Simon hian amah ang bawka French player Jo-Wilfried Tsonga chu 6-4, 7-5 in a lo hneh ve bawk a ni.

Tleirawl Frances Tiafoe a hmuhnawm zel. A zawna season hnih nan Next Gen ATP Finals a khel leh ngei dawn niin a lang, kum 21 mi hian German player Yannick Maden chu darkar khat leh minute 39 chhungin 7-6(7), 6-3 in a hneh.

Inkhel dangah seeded pangana Guido Pella chuan Soonwoo Kwon 7-5, 7-5 a hnehin a vawi khat nan Antwerp-ah hian quarterfinal a lut. Kum 29 mi Pella hian vawi 12 ngawt aces a siam bakah a first serve aṭangin point li chiah a hloh a ni.

Seeded pariatna Pablo Cuevas chuan Andy Murray hmachawn thei turin Hugo Dellien 6-4, 6-3 in a hneh a, season hman laiah Cuevas hian match 44 a khelh tawh aṭangin vawi 24 hnehna a chang - Murray tan hmachhawn a awlsam bik lo ang.