Nishikori leh a coach inṭhen

Kei Nishikori chuan hun rei tak chhung a lo thawhpui tawh coach Dante Bottini nen an thawhdunna a tawp thu a sawi. Kum kua zet amah kaihruaitu hi khawvel huapa mite hriat a hlawh theih nana mi pawimawh a ni.

Nishikori leh Bottini te hi kum 2010 aṭang khan an thawkdun tawh a, a kaihhruaina hnuaiah hian world ranking lamah pawh a tawn san lai ber a thleng - 2015 khan world number 4 dinhmun a chelh. Asia tlangval zinga thleng sang ber hian 2015 khan US Open final hial pawh a lo khel tawh. 2014 aṭang khan French Open champion hlui Michael Chang chu team-ah a lo tel tawh a, American pa nena an thawhdunna erawh a danglam rih dawn lo a nih hmel.

Kum 29 mi Nishikori chuan, "Season kua zet tennis court chhung leh a pawnah kan inzui a, tunah chuan boruak thar tem hun a ni ta zawk. Dante-a'n ka tennis hringnuna a hnathawh zawng zawngte avangin ka lawm a, ka hrereng fo tawh ang," a ti. Tun season-ah Nishikori hian Grand Slam final lut chiah lo mahse a khel chhe ngai lo. Australian Open, Roland Garros leh Wimbledon-ah te quarterfinal a thleng vek a ni.