Asian Junior Championship Jeremy Lalrinnunga a inlan dawn

Nakkum Tokyo Olympic khel thei tura zinkawng pawimawh zawhin Jeremy Lalrinnunga a feh chhuak mek zel. Mizo rawlthar hi October 19-27 chhunga neih tur Asian Junior Weightlifting Championships-ah a inlan dawn.

Inelna hi Pyongyang, North Korea-ah neih a ni dawn, India team hian nimin khan inelna tur hmun an pan. Olympic khel phak tur hian qualifier paltlang tur a tam a, a tlem berah inelna paruk tal hmachhawn a ngai - Jeremy tan tuna mi hi pangana tur a ni a, a dang pathum a la hmabak bawk.

Weightlifting huanga Jeremy hruailuttu coach Malsawma Khiangte chuan a nau hian Olympic a khelh phak a beisei. SYS coach Malsawma chuan, "A chet dan hi duhthusam vek la ni chiah lo mah se India mipa zingah chuan a percent a ṭha ber.

"Tokyo-a inlan turin India hian mipa emaw hmeichhia emaw hmun ruak pahnih a nei dawn a, Mizo rawlthar Jeremy tan kawng a inhawng mek," tiin Vanglaini a hrilh. Govt. Complex rawlthar Jeremy hian nikum khan Youth Olympic Games-ah gold medal a chawi chhuak a, India infiammi zingah gold medal la thei hmasa ber a ni.