Indian Super League a hnai ta

India rama football league ngaihhlut hlawh leh sang ber Indian Super League chu October 20 hian khelh ṭan a ni leh dawn ta a, Mizoram player 22 ngawtin ISL an hmachhawn ve leh dawn. 

ISL club zingah Chennaiyin FC chu Mizo player kawl hnem ber an ni dawn a, South Indian club hian senior squad-ah Mizoram player panga ngawt an kawl - ISL club tinah Mizo an awm vek. Mizo footballer langsar ber tih ngam Jeje Lalpekhlua'n Chennaiyin tan a la khelh chhunzawm zel dawn a, tun hnaia chanchin ngah tak Lallianzuala Chhangte chuan a zawm bawk. 

Anni pahnih bakah hian season hmasaa lo khel tawh Zotea Ralte, Jerry Lalrinzuala leh Laldinliana Renthlei te chu an la cham chhunzawm dawn bawk a, Isaac Vanmalsawma'n a puanthuah telin a chhuahsan thung. Khup hliam zai a nih avangin Jeje-a'n tun thlengin match khelh a la nei lo a, ngai awh leh ṭan tawh mah se South Indian club tan inlan nghal vut vut tura beisei chi a ni lo ang. 

Jerry chu Chennaiyin tan bul ṭan regular leh tura beisei chi a ni a, Lianzuala hi thil tam tak an tiam avanga Chennai lama pem a nih avangin hmun a chan phak ngei beisei a  ni bawk.