Saina a chak, Prannoy a tla

Saina Nehwal chuan Olympic khelh ngei a tum a, kawng dik a zawh mek. India nula hian Barcelona Spain Masters khelh laiah a khingpui Yvonne Li chu  21-16, 21-14 a hnehin second round a lut.

London Olympic bronze medalist Saina hian minute 35 chhungin hnehna a chang a, German nula lakah hna harsa lutuk thawh tur a nei lo. Nizan khan Kidambi Srikanth leh Ajay Jayaram te an inlan a, result kan hre hman lo.

Kum 29 mi Saina hian season hmasa a hmang ṭha lo, kuminah pawh Spain Masters an khelh hma khan inelna pathum a hmachhawnah vawi khat chiah first round a paltlang - Tokyo Olympic khel tur chuan a ranking siamṭhat a mamawh a ni.

Mipa singles lamah H. S. Prannoy chu Malaysian tlangval Daren Liew lakah 18-21, 15-21 in a chak lo. P Kashyap pawh Ygor Coelho nen an inkhelh laklawh laiin hliam vangin a inhnukdawk a, a zinkawng a tawp ve nghal bawk.

Mixed doubles lamah pawh Pranaav Jerry Chopra leh Sikki N. Reddy te an che fuh lo, Indian pair hi an match hmasa berah Denmark player Mathias Christiansen leh Alexandra Boje te ṭangdun lakah 10-21, 21-16, 21-17 in an tlawm.