Tsitsipas-a'n hnehna in bul a ṭan

Stefanos Tsitsipas chuan Marseille Open nomawi a kawl lai humhim a tum a, Nilaini zan khan a khingpui Mikael Ymer lakah set hloh loa hnehna changin quarterfinal a in hlangkai.

Beisei anga season bul ṭan lo Tsitsipas-a'n a inkhelh thiamna hmuna hnehna chang tur hian darkar khat leh minute 11 a mamawh, seeded pahnihna hian aces vawi ruk vaw chhuak chungin 6-1, 6-3 in hnehna a chang.

ATP Finals champion hian ama service hmasa bikah chuan point thum chauh a hloh a, a khingpui hi break point a hmuhtir miah lo - season hmasa ang bawkin atana insiamtharna hun a ni dawn niin a ngaih theih.

Greek tlangval Tsitsipas hian a match lehpekah chuan Vasek Pospisil a hmachhawn leh ang, inkhel dangah Pospisil hian amah ang bawka Canadian player seeded pariatna Hubert Hurkacz chu 6-3, 6-4 in a lo hneh ve bawk a ni.

Seeded parukna Benoit Paire-a'n beisei a phak lo, an rama inelna neihah hian Alexander Bublik chu 3-6, 6-4, 6-4 a hneh loin second round-ah a zinkawng a tawp.

Inkhel dangah Felix Auger-Aliassime chuan match point vawi hnih a inchhanhim hnuin Stefano Travaglia 6-7 (3-7), 7-6 (8-6), 6-3 in a hneh. Auger-Aliassime hian a match lehpekah chuan 7-6 (7-4), 6-4 a Mikhail Kukushkin hnehtu Pierre-Hugues Herbert a hmachawn leh ang.