A tawp kharna duhthusam Chhinga Veng Vs Mizoram Police
Mizoram Premier League-a champion rinkai pahnih Chhinga Veng leh Mizoram Police te chu vawiin chawhnu dar 2:00 hian Kolasib Stadium-ah an inhmachhawn dawn.
Police leh Chhingcows hian point kua ve ve an hmu mek. Lalbiaksanga Colney kaihhruai Police hian tualchhung player sulhnu nei ṭha an kawl khawm a. Chhinga Vengin rawlthar duhawm leh tawnhriat nei ṭha an chawhpawlh ṭhat bakah foreign striker Ouattara Sie an neih avangin team pahnihah buk rit zawk an awm lo.
Inbuatsaihna ṭha
Chhinga Vengin Kolasib boruak leh ground awm dan hrechiang duhin Ningani tlai khan inkhelhna hmun tur an thleng tawh. Anand Gurung leh H. Lalremruata te enkawl team-ah K. Lalnunzama tih loh chu an khel thei vek bawk nen football hmuhnawm an phochhuak thei ang.
Police-in nimin tlai khan Kolasib rawn thleng ve chauh mah se he team hian harhtharna an chang. Match hnuhnung bera Electric Veng an hneh loh hnuah Police player-te mimalin an 'workout' nasa, hetah hian tawnhriat nei ṭha zawk te pawh an tel vek avangin Police khawng zawk kan hmu thei dawn.
Chhingcows an ṭha
Chhinga Vengin midfielder ṭha Ṭhasiama an chhawr thei tawh a, khelhna hmun chan erawh a awlsam dawn lo.
Ramhlun North an hneh ṭumin KC Larchhuakmawia chu midfield khaikhawmtu a ni a, a hma chiahah ball thiam pahnih Lalsawmzela leh Indian Messi an tih C. Lalchungnunga te an awm. Tlarhmaah goal nga khung tawh MC Malsawmzuala an awltir ngam a rinawm a, Quattara Sie thlawp turin Malsawmdawnga leh Ṭhasiama bakah Silvana Lalruatkima leh Vanlalhriata te an awm cheu.
Tlarhnung thlengin Chhinga Veng an chhah ṭha a, match hnung berah pawh defender Lalthlahlova (Patea) an awltir thei a ni.
Police an ṭha zawk?
Police-in foreigner nei lo mah se tlarhmaah F. Lalrinpuia (Valpuia), Lalfakzuala, Lalbiakhlua, Lalsangbera leh Malsawmfela te an awm. Mizo forward ṭha ber bera sawite chawm tur hian kalna apianga nomawi in a zui emaw tih mai tur R. Malsawmtluanga a la awm bawk.
Police ṭhat tawk lohna erawh tlarhnung a ni a, hetah pawh hian hming langsar Lalrinzuala Khiangte, Lalhmunmawia, B. Zoramthanga leh R. Lalthantluanga te an kawl - bench erawh a pan deuh. Chutihrualin goalkeeper ṭha F. Lalmuanawma an neih avangin MPL club tlarhnung awhawm ber zinga mi an ni tho.