Man City mawina Kevin de Bruyne

Kevin de Bruyne-a thiam zia inhrilh nawn a ngai lo, Belgium international hian Manchester City chu West Ham United lakah 2-0 in hnehna a chan pui, goal a khung bakah Rodri khung tur a siamsak bawk.

Man City tan hnehna chan a lawmawm a, inkhelh banah manager Pep Guardiola-a'n hremna tawk mah se Etihad Stadium a chhuahsan loh tur thu a sawi chiang a, fans tan chuan thawk huaina tham a tling ngei ang.

Guardiola naute hian match 25 khelh tawhah hmahruaitu Liverpool an phak lohna chu point 22 zet a la ni tho; a zawna vawi hnih Premier League champion hian an nomawi chu Reds lakah an chan ngei chu a rinawm.

Nilaini zan Etihad Stadium-a inkhelah Pep Guardiola-a'n a neih ṭhat a chhawr a, tlarhmaah Sergio Aguero leh Gabriel Jesus te inkawpin an hnungah KDB bakah captain David Silva leh Bernardo Silva te an awm.

Defender rinrawl Aymeric Laporte a lo kir leh tawh a, ball pet thiam Benjamin Mendy pawhin a hmun ngai a luah leh tawh - player langsar rual zinga hmuhnawm ber chu Kevin de Bruyne a ni.

De Bruyne hian Aguero leh Jesus te tan hun ṭha siamsak hmasa mah se striker pahnih hian an khung lo, minute 30-naah a corner pet chu midfielder Rodri-a'n chiang zetin a tauh lut.

Second half minute 60-naah KDB hun a thleng, City player-ten mawi taka ball an inpek kual hnuah Bernardo Silva chuan box chhunga a ball chan chu tawih zeta lirin Belgium midfielder hian chiang zetin a hlap lut.

EPL nomawi humhim a harsa tawh dawn a, chutih rualin Guardiola erawh a la beidawng lo. Man City manager chuan, "Khelmual chhungah chuan mi puitling kan nihna kan lantir, a pawn lam erawh kan thunun theih bak a awm.

"Season tawp thlenga theihtawp chhuah tur kan ni tih kan hria, he club hmangaihtuten chutianga kan khel hmuh chu an phu. Match thinah hian thil thar ngaihnawm tak a awm zel a, a theih chhung chu kan theihna sang berin kan khel ang," a ti.

Chak lo West Ham erawh 18-naah an awm chhunzawm a, inhamtang tur chuan ṭhanharh a hun hle. Hammers manager David Moyes chuan, "Man City player-te nena khaikhin ralah chuan kan dinhmun a inang lo em a ni, ka naute khan an theihtawp chu an chhuah ve tho.

"EPL khel zui zel tur chuan point 40 chin hi a hima ngaih a ni ṭhin, tunah chuan kan dinhmun a hautak ta hle," a ti. Moyes-a naute hian match 25 aṭangin point 24 an hmu. Khelh hmabak 13 aṭangin point 39 la hmuh theih mah se match khat zelah point khat an hmuh tlin loh avangin an mamawh zat point 16 hmuh hi a harsa dawn.

•    Manchester City hian West Ham nen an intawn hnuhnung pakuaah hnehna an chang vek, goal 30 khungin anmahni lamah goal thum chiah a lut.

•    Kum 2011 February thla hnua a vawi khat nan West Ham hi Premier League match 26 khelh chinah tla thei dinhmunah an ding, 2011 hian league-ah a hniam ber ni chungin season an khar.

•    Pep Guardiola hian inelna hrang hranga West Ham a hmachhawn hoah hnehna a chang vek, manager a nih hnuah 100% record a neihna club an ni.

•    David Moyes-a'n Everton a enkawl lai khan Man City vawi 22 a hmachhawnah vawi ruk a chak lo, club dang a enkawl hnuah erawh City hi vawi sarih hmachhawn leh tawhin a tlawm vek.

•    Rodri-a'n West Ham lakah vawi 178 pass a nei a, 2003-04 aṭanga data mumal taka dah a nih hnuah EPL record a ni. Hammers player zawng zawngin pass an neih belhkhawm chu vawi 169 chauh a ni.

Europe-a football thuneitu sang UEFA chuan Manchester City hi Financial Fair Play Regulations (FFP) an bawhchhiat avangin hremna a ti chhuak hlim a ni a, English club hi season hnih chhung European football khel thei lo tura hrem an nih bakah pound maktaduai 25 chawitir an ni bawk.

Hrem an nih an hriat hnua an match hmasa berah Man City fans lamin UEFA an demna thu an au chhuahpui nasa. Etihad Stadium chhunga inkhel entute chuan UEFA demna thu inziahna hrang hrang an ken bakah an manager Guardiola leh club neitu Sheikh Mansour thlawpna hla an sa nasa hle.

Man City hian hremna chu an tawk ngei a, amaherawhchu a la tawp mai lo. Infiamna lama thubuai ngaihtuahtu sang ber Court of Arbitration for Sport hnenah an la zualko thei. CAS hian a duh chuan hremna hi a tinep emaw a hlihsak emaw hial thei a ni.

Spanish manager Guardiola chuan, "Kan khinglet a, kan dik ngei nia kan inhriat chuan bei let turin dikna kan nei," tiin a sawi. CAS hian football mai ni loin infiamna peng danga club leh mimal hrem tawkte pawh an thubuai a lo ngaihtuah tawh ṭhin.

City pawh hrem dawn mah se an khinlet dawn avangin an dinhmun tur a la chiang bik lo. Zawhna chhangin Pep chuan, "Club hian a theihtawp a chhuah dawn, club thil tih leh min hrilhfiah dan angah chuan an lakah 100%-in rinna ka nghat.

"Hrem leh hrem loh boruak hi chu a la zo mai dawn lo, thu chiang a awm hma chuan theihtawpin ṭha taka khelh zel mai kha kan tih tur a ni," a ti. City hian Inrinni zanah league match an khel zui leh dawn, pathumna Leicester City an lenchilh ang.

Football hremna bakah tun hnaiah tennis lamah CAS inrawlhna lian a thleng tawh. Maria Sharapova chu damdawi hman phal loh 'meldonium' a hmang tih hmuhchhuah a ni a, International Tennis Federation chuan kum hnih atan an hrem. 

Mahse, Sharapova thiam loh an chantirna damdawi hi tun hma lama hman phal, a hnu lama an phal loh a ni. Sharapova hi CAS hnenah zualkoin kum hnih hrem chu thla 15 atan an tih tawisak tawh a ni. City pawh an hremna hi a tlang ngei dawn em tih leh, an tih tlemsak ang em tih chu zawhna awm mek a ni.