Aizawl FC-in an thiamna Kolasib hmuhtir
Kolasib-a Mizoram Premier League match hmasa berah Aizawl FC chuan MPL kaithar 3-0 in an hneh a, hmahruaitu thar an ni.
Nimin chhun inkhel nung ṭha takah Aizawl FC tan Rochharzela, Alfred Kemah Jaryan leh F. Lalremsanga ten goal khat ṭheuh an khung a, Isak Vanlalruatfela chu man of the match-a thlan a ni.
AFC an thiam
Aizawl FC-in bul ṭan ṭhain Rochharzela'n minute lina lekah box pawn aṭangin ṭhazetin a pet goal a, I League club-in inkhel an thunun nghal.
FC Venghnuai an che thei lo a, Aizawl FC ball inpe kual an thlir a ni ber. I League club hian 70% ball possession an nei pha a, hei hian inkhel kalhmang a sawifiah. AFC-in inkhel an thunun rah sengin best player ni lai Alfred Kemah Jaryan-a'n ṭha zeta a lakluh hnuah minute 37-naah kawh zetin a pet goal.
FC Venghnuaiin first half-ah goal dang an chhuah loh avangin beiseina tlem an la nei. Aizawl FC erawhin ngaih ṭha takin dressing room an pan.
Venghnuai thar
Second half-ah FC Venghnuai dang daih an rawn inlan a, Aizawl FC an bet ve ta thung. MPL kai tharin chance ṭha pathum nei nghalin AFC keeper Lalawmpuia'n a dan bakah VL Thanga ball tauhin crossbar a per.
Amaherawhchu, I League thlenga tawnhriat nei ṭha coach Standly Rosario hnuaia khel Aizawl FC an danglam a, counter attack turin an inpeih reng. FC Venghnuaiin an nawr luatah goal venhim an ngaihthah a, Isak-a chance neih hmasak keeper RS Lallawmzuala'n a dang. Mahse minute 79-naah Venghnuai beisei a tawp, Isak-a bawkin ding lam aṭanga la lutin keeper Lawma a paltlang hnuah a cross ṭha zet chu Lengpui tlangval Remsanga'n a tauh lut.
Field ṭha danglam
Aizawl FC coach Standly Rosario chuan, "Kolasib nuam kan ti a, inkhel entu an tam bawk nen minti phur hle. Kan khel ṭhat tak erawh khelmual a ni a, Lammual nen a inthlau hle. Ground ṭhaah chuan kan duh angin kan khel thei a, kan zir angin kan khel thei a ni," tiin Vanglaini a hrilh.
Standly chuan sawi chhunzawmin, "Inkhel kan thunun vekah kan ngai. Second half tira min rawn nawr chhan chu goal hnih kan khung tawh vang a ni a, kan rinlawk ang chiah a ni zawk," tiin point thum hmuhchhuah an phu thu a sawi.
Football ngaina khua Kolasibin MPL an ngaihhlu a, chhun pachangah pawh entu ṭhahnem tak an awm thei a. Inkhel a nun phah hle.