Luol Deng a chawl ta

South Sudan aṭanga NBA khel phak Luol Deng chuan Ningani zan khan basketball a chawlhsan thu a puang a, kum 34 mi chauh niin a infiamna ngainat leh hmangaih ber hi a mangṭha a ni.

Wau, Sudan-a piang Deng hian 2004 khan NBA a luhchilh ṭan a, season 10 chhung zet Chicago Bulls tan a khelh hnuah Miami Heat, Los Angeles Lakers leh Minnesota Timberwolves tan a khel leh bawk. Deng hian a hun tawp lam chu Minnesota Timberwolves tan khel mah se, a bul ṭanna Bulls-ah ngei hmawr bawk a duh. Bulls nen hian ni khat daih contract an ziak a, a tukah a chawlh zui a ni.

Chicago Bulls neitu Michael Reinsdorf chuan, "Luol-a'n kan hnena awm chung ngeia chawlh a thlang hi kan vannei hle. Kan tana a khelh lai khan court chhung leh a pawnah mi entawn tlak a ni a, a theihna zawng zawng kan tan a hlan," a ti.

Deng-a hi Sudan lama piang ni mah se British khua leh tui nihna a nei. Great Britain tan match 43 a khel a, 2012 London Olympic-ah pawh khan a inlan. NBA-ah chuan season 15 chhungin match 902 a khel, 2012 leh 2013 khan NBA All-Star atan thlan a ni hial.